O‘zbekiston ichki ehtiyojlarni qondirish maqsadida tabiiy gaz eksportini to‘xtatdi. Bu haqda Xabardor.uz’ga Energetika vazirligi Matbuot xizmati ma’lum qildi.  

Shuningdek, 2022-yilda O‘zbekiston tomoni Rossiyaga tabiiy gaz eksportini rejalashtirmagan.

“Ayni paytda Rossiya Federasiyasiga gaz yetkazib berilmayapti, 2022-yilga ham reja qilinmagan”, – deydi vazirlik vakili.

“Interfaks” berayotgan ma’lumotga ko‘ra, O‘zbekiston 2018 yilda “Gazprom”ga 3,8 milliard kub metr yetkazib bergan. 2019-yilda yetkazib berish hajmi 4,9 mlrd. metr kubga yetgan. 2020 yilda esa gaz yetkazib berish to‘xtatilgan. Bundan tashqari, 2020-yilda “Gazprom” turkman gazini O‘zbekistonga yetkazib berishni boshlagan.

“Biz O‘zbekistonda iste’molning katta o‘sishini kuzatayapmiz. Shu bois, tabiiyki, gaz xaridi u yoki bu darajada qisqaradi, chunki davlat gazni o‘z ehtiyojlari uchun yo‘naltiradi”, – degan edi 2021-yil may oyida o‘zbek gazi bilan bog‘liq vaziyatga “Gazprom” boshqaruvi raisi o‘rinbosari Yelena Burmistrova.

Statistik ma’lumotlarga ko‘ra, 2020-yilda O‘zbekistonda tabiiy gaz qazib olish hajmi 47,1 milliard kub metrgacha qisqargan (2019-yilda 57,3 mlrd. metr kub). Shu bilan birga, ichki iste’mol ham deyarli o‘zgarmagan – 43 milliard kub metr (2019 yilda 44,4 mlrd. kub metr).

O‘zbekiston gazining asosiy xaridori Xitoy hisoblanadi. XXR bojxona ma’lumotlariga ko‘ra, 2020-yilda 3,277 milliard kub metr gaz yetkazib berilgan bo‘lsa, 2021-yilning 10 oyi davomida yetkazib berish ikki barobardan ko‘proqqa oshib, 4 milliard 200 million kub metrga yetgan.

• Eksport
• Gaz
• Rossiya