31°
Kechasi 18°
Kecha, 8-dekabr kuni genetika sohasining yetakchi namoyandasi, O‘zbekiston Respublikasi Fanlar akademiyasi akademigi Abdullayev Abdumavlon Abdullayevich 92 yoshida vafot etdi. Shu munosabat bilan Prezident Shavkat Mirziyoyev hamdardlik bildirdi.
A.Abdullayev 1930-yilning 13-iyulida Namangan viloyatida tug‘ilgan. 1952-yili O‘rta Osiyo davlat universitetini tugatib, mehnat faoliyatini O‘simlikshunoslik ilmiy tekshirish instituti O‘rta Osiyo tajriba stansiya kichik ilmiy xodimi lavozimida boshlagan. 1961-yilda nomzodlik, 1973-yilda doktorlik dissertasiyasini himoya qilgan. 1995-yilda O‘zbekiston Respublikasi Fanlar akademiyasining haqiqiy a’zosi etib saylangan.
“Iste’dodli olim o‘zining qariyb 70 yillik ilmiy faoliyati davomida Fanlar akademiyasida fidoyilik bilan mehnat qildi. Genetika va o‘simliklar eksperimental biologiyasi instituti kichik, katta ilmiy xodimi, laboratoriya mudiri, direktori, O‘zRFA Prezidiumining qishloq xo‘jaligi fanlari bo‘limi raisi hamda umrining so‘nggi kunlarigacha instituti bosh ilmiy xodimi lavozimida samarali faoliyat ko‘rsatib, ilm-fan rivojiga munosib hissa qo‘shdi”, – Prezident matbuot xizmati xabarida.
A.Abdullayev ilmiy faoliyati davomida g‘o‘za genetikasining fundamental asoslarini rivojlantirishga ulkan hissa qo‘shgan. Olim yaratgan ilmiy maktab asosida g‘o‘zaning bir qator yangi navlari kashf etildi hamda genetika seleksiyasida g‘o‘zaning yovvoyi turlaridan foydali donorlar sifatida foydalanish imkoniyati yaratilgan. Mamlakatimiz paxtachilik ilm-fani rivojining fundamental asosi va milliy boyligi bo‘lgan g‘o‘za genlari kolleksiyasining asoschilaridan biridir.
U 600 dan ortiq ilmiy ishlar, jumladan 10 dan ortiq monografiyalar muallifi hisoblanadi. Ilmiy maqolalarining 300 dan ortig‘i xalqaro nufuzli jurnallarda chop etilgan.
Jonkuyar ustoz sifatida ko‘plab yoshlarga ilm-fan sirlaridan saboq bergan zahmatkash olimning bevosita rahbarligida 20 dan ortiq fan doktori va 40 ga yaqin fan nomzodlari tayyorlangan.
Akademik A.Abdullayevning mamlakat ilm-fanini rivojlantirish borasidagi xizmatlari munosib taqdirlangan. U “O‘zbekistonda xizmat ko‘rsatgan fan arbobi” (1980), “Mehnat shuhrati” ordeni (2003) “O‘zbekiston Respublikasi davlat mukofoti” (2011) sohibi hisoblanadi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
