O‘zbekiston Mastercard va CrescentRating tomonidan har yili eʼlon qilinadigan “Jahon musulmon sayohati indeksi” ro‘yxatida kuchli o‘ntalikdan o‘rin oldi.

Singapurda o‘tkazilayotgan “Halal in Travel 2022” sammitida CrescentRating tashkiloti rahbari Fazal Bahardin bu yilgi ko‘rsatkichlarni eʼlon qilar ekan, O‘zbekistonga alohida to‘xtalib, reytingda eng tez ko‘tarilayotgan va boshqalar uchun o‘rnak bo‘ladigan mamlakat sifatida eʼtirof etdi.

O‘zbekiston ushbu hisobotda 2017-yildagi 32-o‘rindan bu yil 9-o‘ringa ko‘tarilishga erishgan.

Maʼlumot uchun, mazkur reytingni ishlab chiqishda qirqdan ortiq mezonlar, jumladan, mamlakatning sayyohlarga ochiqlilik siyosati, musulmon sayyohlarga yaratilgan imkoniyatlar, targ‘ibot va marketing ishlari, shuningdek, sayyohlarga islom merosini taqdim etish darajalari inobatga olinadi.

Eslatib o‘tamiz, mazkur xalqaro reytingda O‘zbekiston 2021-yilda olti pog‘ona yuqorilab 16-o‘rinni egallagan hamda eng jadal ko‘tarilgan mamlakat sifatida alohida eʼtirof etilgan edi. O‘zbekiston ushbu reytingda 2018-yilda 32-o‘rin, 2019-yilda 22-o‘rinda qayd etilgan.

• Islom
• Musulmon
• O‘zbekiston musulmonlari idorasi
• reyting