Osiyo taraqqiyot banki (OTB) O‘zbekiston g‘arbidagi yirik shahar markazlarini bog‘lovchi 465 kilometrlik temir yo‘l liniyasini elektrlashtirish, temir yo‘l xizmatlarini yaxshilash hamda mintaqada savdo va turizmni rivojlantirish uchun 162 million dollarlik kredit ajratishni ma’qulladi.

Loyiha Buxoro, Miskin, Urganch va Xorazm viloyatidagi YUNESKOning Jahon merosi ro‘yxatiga kiritilgan Xiva shaharlarini bog‘lovchi yo‘lni elektrlashtiradi. Bu soatiga 250 kilometr tezlikda harakatlanuvchi tezyurar poyezdlarning harakatlanishi, Buxoro va Xiva o‘rtasidagi qatnov vaqtini ikki soatgacha qisqartirish, poytaxt Toshkentdan Xivaga yetti soatda yetib borish imkonini beradi.

“Ishonchli va xavfsiz transport infratuzilmasi iqtisodiy o‘sishning asosiy omili hisoblanadi, ayniqsa dengizga chiqish imkoniyati bo‘lmagan O‘zbekistonda. OTB loyihasi Xorazm viloyatini O‘zbekistonning qolgan qismi bilan bog‘laydigan iqtisodiy yo‘lak yaratishga, Covid-19 pandemiyasi sharoitida turizmni tiklashga yordam beradi va mamlakatni mintaqaviy tranzit markazi sifatida yanada mustahkamlaydi”, – deydi OTBning Markaziy va Gʻarbiy Osiyo bo‘yicha Bosh direktori Yevgeniy Jukov.

“Buxoro-Xiva” liniyasi elektrlashtirilgach, yillik yo‘lovchi tashish hajmi joriy yilda 280 ming yo‘lovchidan 2026-yilga kelib 1 million yo‘lovchidan ko‘proqqa oshishi kutilmoqda. 2026-yilga borib yuk tashish hajmi yiliga jami 11,8 million tonnaga yetishi kutilyapti.

Hukumat, shuningdek, Osiyo infratuzilma investitsiyalari bankidan 108 mln dollar miqdorida kredit so‘ragan. Buni bank boshqaruv kengashi ma’qullagan. OTB ushbu kreditni qisman boshqaradi.

Qayd etilishicha, OTB temir yo‘l operatsiyalari va boshqaruvi bo‘yicha tanlangan ayollarni o‘qitish kabi asosiy gender tadbirlarini qo‘llab-quvvatlash uchun 300 000 AQSh dollari miqdoridagi texnik yordam grantini taqdim etadi.

• Kredit
• OTB