O‘zbekiston o‘tgan yilga nisbatan 6 foizga ko‘proq tabiiy gaz eksport qildi. Bu haqda Markaziy bankning joriy yilning 9 oyi uchun To‘lov balansi, xalqaro investitsion pozitsiyasi va tashqi qarzi bo‘yicha nashrida ma’lum qilindi.

MB ma’lumotiga ko‘ra, joriy yilning 9 oyida eksport tarkibidagi tabiiy gazning ulushi o‘tgan yilning mos davriga nisbatan 6 foizga o‘sib 498 mln. dollarni tashkil qildi. Bunda, jami eksportdagi tabiiy gazning ulushi 84 foizi Xitoyga, 12 foizi Rossiyaga, 3 foizi Tojikistonga va 1 foizi Qirg‘izistonga to‘g‘ri kelgan.

Qayd etilishicha, 2021-yilning 9 oyida tovarlar eksporti (nomonetar oltin eksporti va tuzatishlarni hisobga olmagan holda) o‘tgan yilning mos davriga nisbatan 42 foiz yoki 2,0 mlrd. dollarga o‘sgan (2020-yil 9 oyida 23 foiz yoki 1,5 mlrd. dollarga kamaygan).

Shuningdek, 2021-yilning 9 oyi bo‘yicha tashqi savdo aylanmasi (nomonetar oltin  va tuzatishlarni hisobga olganda) 25,1 mlrd. dollarni tashkil etgan (2020-yil 9 oyda 24,4 mlrd. doll.). Bunda, eksport va import hajmlari mos ravishda 8,5 mlrd. va 16,6 mlrd. dollarga teng bo‘lib, savdo balansining defitsiti 8,1 mlrd. dollarni tashkil etgan.

Eslatib o‘tamiz, avvalroq, O‘zbekistonning yanvar-oktyabr oylarida Xitoyga umumiy qiymati 601,3 mln dollarga teng 2,6 mln tonna gaz eksport qilingani haqida xabar tarqatilgan edi.
 

• Eksport
• Markaziy bank