31°
Kechasi 18°
Kecha hukumat delegatsiyasining tashrifi doirasida Boku shahrida bo‘lib turgan O‘zbekiston Respublikasi Bosh vazirining o‘rinbosari – investitsiyalar va tashqi savdo vaziri Jamshid Xodjayev Ozarbayjon Respublikasi Bosh vazirining o‘rinbosari Shahin Mustafoyev bilan uchrashuv o‘tkazdi.
Ma’lum qilinishicha, ikki mamlakatning asosiy vazirlik va idoralari rahbarlari ham ishtirok etgan uchrashuvda investitsiyaviy, savdo va sanoat kooperatsiyasi sohasidagi ikki tomonlama hamkorlikning keng kun tartibi ko‘rib chiqildi.
“Uchrashuv avvalida tomonlar ikki tomonlama munosabatlar rivojidagi ijobiy dinamikani va Ozarbayjon Respublikasi Prezidenti Ilhom Aliyevning joriy yil iyun oyida O‘zbekiston Respublikasiga buyurgan davlat tashrifining muhim natijalarini hamda ikki davlat o‘rtasidagi strategik sheriklikni chuqurlashtirish va kengaytirishga kuchli turtki bo‘lganini qayd etdilar”, – deyiladi vazirlik xabarida.
Uchrashuvda savdo aloqalarining bugungi holati va rivojlanish istiqbollari ko‘rib chiqildi. Kelgusi 5 yilda o‘zaro tovar ayirboshlash hajmini 1 milliard dollarga yetkazishga o‘zaro tayyorlik bildirilgan va bu borada bir qator aniq amaliy chora-tadbirlar kelishib olingan.
Ikki tomonlama munosabatlarning istiqbolli yo‘nalishlari qatorida ikki mamlakat hududlari o‘rtasidagi to‘g‘ridan-to‘g‘ri aloqalarni kengaytirish ham muhim ahamiyatga ega ekanligi ta’kidlandi. Ishbilarmonlar kengashining navbatdagi yig‘ilishini hamda istiqbolli investitsiya loyihalarining “road-shou”si bilan birga O‘zbekiston va Ozarbayjon hududlari birinchi forumini 2023 yil boshida Toshkent shahrida tashkil etish bo‘yicha kelishuvga erishildi.
Suhbat chog‘ida sanoat kooperatsiyasini chuqurlashtirish, ya’ni qo‘shma ipakchilik va to‘qimachilik klasterlarini tashkil etish, mashinasozlik, kimyo, neft-kimyo va zargarlik sanoati, energetika, qishloq xo‘jaligi va boshqa sohalarda qo‘shma investitsiya loyihalarini amalga oshirish yuzasidan aniq amaliy chora-tadbirlar muhokama qilindi.
Muzokaralar yakunlari bo‘yicha tomonlar erishilgan kelishuvlarni ilgari surish va ikki tomonlama sheriklikning yangi yo‘nalishlarini rivojlantirish maqsadida hamkorlikni yanada chuqurlashtirishga sodiqligini bildirgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
