Bugun, 24 mart kuni Prezident Shavkat Mirziyoyev Xalqaro investisiya forumi doirasida O‘zbekistonda amaliy tashrif bilan bo‘lib turgan Turkiy davlatlar tashkiloti Oqsoqollar kengashi raisi, Turkiyaning Adolat va taraqqiyot partiyasi raisining o‘rinbosari Binali Yildirimni qabul qildi. Bu haqda Prezident matbuot xizmati xabar berdi.

Qayd etilishicha, uchrashuv avvalida Binali Yildirim davlat rahbariga Turkiya Prezidenti Rejep Tayyip Erdo‘g‘anning salomini yetkazgan.

Shavkat Mirziyoyev O‘zbekiston-Turkiya strategik sheriklik munosabatlarining bugungi darajasini mamnuniyat bilan qayd etib, o‘zaro savdo hajmlari ortayotgani, zamonaviy sanoatni barpo etish va infratuzilmani modernizasiya qilish bo‘yicha yirik investisiya loyihalari amalga oshirilayotgani hamda madaniy-gumanitar aloqalar mustahkamlanayotganini ta’kidlagan.

Ma’lum qilinishicha, bugungi kunda O‘zbekiston va Turkiya o‘rtasidagi Strategik sheriklik bo‘yicha oliy darajadagi kengashning navbatdagi yig‘ilishini o‘tkazishga faol tayyorgarlik ko‘rilmoqda.

Shuningdek, Turkiy davlatlar tashkiloti doirasidagi hamkorlik masalalari ham ko‘rib chiqilgan. 2021 yilning noyabr oyida tashkilotning Istanbul sammitida erishilgan kelishuvlarni amalga oshirishga alohida e’tibor qaratildi.

Bundan tashqari, savdo, transport va logistika, sanoat kooperasiyasi, “yashil” iqtisodiyotni rivojlantirish, innovasiyalar va yuqori texnologiyalar transferi kabi sohalardagi qo‘shma tashabbus-loyihalari ilgari suriladi.

Qayd etish mumkin, mintaqa kun tartibidagi dolzarb masalalar yuzasidan ham fikrlar almashilgan.

• O‘zbekiston
• Shavkat Mirziyoyev
• Turkiya
• Turkiyzabon