So‘nggi paytlarda davlat idoralari, ayniqsa, mahalliy hokimliklarga tadbirkorlar tomonidan homiylik sifatida turli qimmatliklar, shuningdek, ishlar va xizmatlar beg‘araz taqdim etilayotganligi, davlat va shaxsiy masalalar aralashib ketayoganligi, manfaatlar to‘qnashuviga yo‘l qo‘yilayotganligi holatlari kuzatilmoqda.  Bunga nisbatan aksariyat hollarda jamoatchilik salbiy munosabat bildirmoqda. Bunday masala ko‘tarilayotganligining o‘zi  juda katta ijobiy o‘zgarish.

Korrupsiyaga qarshi kurashish agentligining Xabardor.uz’ga ma’lum qilishicha, Agentlik bu boradagi munosabatlarni normativ-huquqiy hujjatlar asosida tartibga solishni rejalashtirmoqda.

“Davlat rahbari tomonidan davlat xizmatida sovg‘a olish-berish, shuningdek, manfaatlar to‘qnashuvini tartibga solish bo‘yicha Agentlik zimmasiga aniq vazifalar yuklatilgan. Shu maqsadda ishlab chiqilgan “Davlat fuqarolik xizmati to‘g‘risida”gi qonun loyihasiga “Sovg‘a siyosati” nomli alohida bob kiritildi. Unda davlat xizmatchilari qabul qiladigan sovg‘alarning miqdori va tartiblari qat’iy belgilanmoqda”, – deyiladi Agentlik munosabatida.

Bundan tashqari, davlat xizmatiga ishga qabul qilish va unda faoliyat olib borishda qarindosh-urug‘chilik (nepotizm) kabi korrupsiyani keltirib chiqaruvchi omillarning oldini olish, bunday holatlarga yo‘l qo‘yganlik uchun javobgarlikni belgilashni nazarda tutuvchi qonun loyihasi ham ishlab chiqilgan va jamoatchilik muhokamasiga taqdim etilgan.

“Hozirda Germaniya tajribasi asosida homiylik bilan bog‘liq munosabatlarni ham yanada takomillashtirish bo‘yicha ish olib borilmoqda”, – deyiladi Agentlik ma’lumotida.

Eslatib o‘tamiz, avvalroq fuqaro Ziyoda Latipovaning Toshkent shahar hokimiyatiga bahosi qariyb 250 ming AQSh dollari bo‘lgan Mercedes Benz avtomobilini sovg‘a qilgani haqida ma’lum qilingan edi.

• Agentlik
• Korrupsiya