Bu haqda Energetika vazirligi matbuot xizmati xabar berdi.

Ma’lum qilinishicha, 22-noyabr kuni Olmaota shahrida O‘zbekiston, Qozog‘iston va Qirg‘iziston energetika hamda suv xo‘jaligi vazirlarining yig‘ilishi bo‘lib o‘tdi. Muzokaralarda O‘zbekiston energetika vaziri Jo‘rabek Mirzamahmudov, suv xo‘jaligi vaziri Shavkat Hamroyev, Qozog‘iston energetika vaziri Yerlan Akkenjenov, suv resurslari va irrigatsiya vaziri Nurjan Nurjigitov, Qirg‘iziston energetika vaziri Taalaybek Ibrayev va suv resurslari, qishloq xo‘jaligi va qayta ishlash sanoati vaziri o‘rinbosari Almaz Jeenaliyev ishtirok etdi.

Tomonlar suv-energetika sohasidagi hamkorlikni yanada rivojlantirish parametrlari to‘g‘risida kelishib oldi. To‘xtag‘ul suv omboridagi murakkab vaziyatni hisobga olgan holda, uchrashuv ishtirokchilari o‘zaro elektr energiyasi yetkazib berish orqali bir-birlarini qo‘llab-quvvatlash, isitish mavsumini muvaffaqiyatli o‘tkazish va kelgusi vegetatsiya mavsumiga tayyorgarlik ko‘rish uchun birgalikdagi sa’y-harakatlarni muvofiqlashtirishga qaror qilishdi.

Qozog‘iston va O‘zbekiston kuz-qish mavsumida Qirg‘izistonga elektr energiyasi yetkazib berishga tayyorligini tasdiqladi. Bu Qirg‘iziston tomoniga qishda elektr energiyasi ishlab chiqarish hajmini kamaytirish va To‘xtag‘ul suv omborida suv to‘plash imkonini beradi. Jamg‘arilgan hajm vegetatsiya davrida janubiy hududlarning qishloq xo‘jaligi yerlarini barqaror sug‘orishni ta’minlash uchun Qozog‘iston va O‘zbekistonga yo‘naltiriladi.

Bundan tashqari, mintaqada iste’molni kamaytirish va energiyani tejash bo‘yicha qo‘shma chora-tadbirlar ko‘rish to‘g‘risida kelishuvga erishildi.

Muzokaralar ishtirokchilari hamkorlikdagi ishlar yaxshi qo‘shnichilik ruhida olib borilayotgani va butun Markaziy Osiyoda energetika xavfsizligi va barqarorligini mustahkamlashga qaratilganini ta’kidladi. Shuningdek, O‘zbekiston tomoni tranzit, yetkazib berish va energiya tizimini muvozanatlash uchun texnik shartlarni ta’minlashga tayyorligini tasdiqladi.

Yig‘ilish yakunida 2026-yil vegetatsiya davri uchun qishki elektr energiyasi yetkazib berish va suv to‘plash hajmlarini huquqiy jihatdan mustahkamlovchi uch tomonlama bayonnoma imzolandi.

14-noyabrda Markaziy Osiyo davlatlari Chordara suv omboriga vegetatsiyalararo davrda kelishi kutilayotgan suv miqdori bo‘yicha kelishuvga erishgandi. Uchrashuvda ishtirokchilar Orolni qutqarish xalqaro jamg‘armasi asoschisi davlatlar rahbarlarining sammitlarida belgilangan vazifalarni amalga oshirish masalalarini ham muhokama qilishgan.

• Bitim
• Muzokara
• O‘zbekiston
• Qirg‘iziston
• Qozog‘iston