O‘zbekiston hukumati Rossiyadan gaz import qilish tizimini modernizatsiya qilish uchun 500 mln dollar ajratishni rejalashtirmoqda. Maqsad – kunlik tabiiy gaz qabul qilish hajmini 9 mln kub metrdan 32 mln kub metrgacha oshirish.

“O‘ztransgaz” shimoldan import qilinadigan tabiiy gazni qabul qilish hajmini oshirish bo‘yicha magistral gaz tizimini modernizatsiya qilish dasturini amalga oshiradi. Bu – hukumatning “2024-yil I choragiga mo‘ljallangan investitsiya dasturini amalga oshirish chora-tadbirlari to‘g‘risida”gi qarorida ko‘zda tutilgan.

Qayd etilishicha, 2024-2030-yillarda bajarilishi nazarda tutilgan birinchi bosqichda tabiiy gaz qabul qilishni kuniga 32 mln kub metrga yetkazish ko‘zda tutilgan. Loyihani xorijiy kreditlar hisobidan moliyalashtirish rejalashtirilgan.

Shuningdek, respublika magistral gaz uzatish tizimini modernizatsiya qilish va samaradorligini oshirish dasturini amalga oshirish dasturi (2021-2024-yillar) ham davom ettiriladi. Umumiy qiymati 483 mln dollar bo‘lgan loyiha 511 km magistral gaz quvurlari va 10 ta gaz nasos agregatini modernizatsiya qilishni ko‘zda tutadi.

Ma’lumot uchun, 2023-yilning 7-oktyabr kuni O‘zbekiston, Qozog‘iston va Rossiya prezidentlari Moskvada o‘tgan tadbirda rus gazini Qozog‘iston orqali O‘zbekistonga yetkazib berish jarayoniga start bergandi. Buning uchun 1960-yillarda Turkmaniston va O‘zbekistondan Rossiyaga gaz uzatish uchun qurilgan “O‘rta Osiyo – Markaz” nomli magistral tarmoq teskari ishlashga moslashtirildi.

• Gaz
• Import
• Rossiya