Serbiyada maktab o‘quvchilari o‘rtasida jahon chempionati – “FIDE World School Chess Championships” 2025 o‘tkazildi.

E’tiborlisi, ushbu dunyo birinchiligida o‘zbekistonlik yosh shaxmatchilar ham muvaffaqiyatli ishtirok etishdi.

Sarvinoz Begmuratova 13 yoshgacha qizlar o‘rtasida 9 imkoniyatdan 7,5 ochko to‘plab, biror mag‘lubiyatsiz chempionlikni qo‘lga kiritdi. Sarvinoz ushbu muvaffaqiyati bilan “FIDE Women FIDE Master” (WFM) unvonini olish imkoniyatiga ham ega bo‘ldi. Nilufarxon Imomqo‘ziyeva 15 yoshgacha qizlar o‘rtasida 7 ochko jamg‘arib, musobaqa g‘olibasiga aylandi. U Serbiya, Ruminiya, Hindiston, Kuba va Gruziyaning kuchli shaxmatchilarini mag‘lubiyatga uchratib, xalqaro reytingini 60 punktga oshirishga muvaffaq bo‘ldi. Nurmuhammad Ne’matillaxonov esa 9 yoshgacha bo‘lgan o‘g‘il bolalar o‘rtasida 7,5 ochko jamg‘arib, oltin medalni qo‘lga kiritdi.

Jahon chempionati yakunlariga ko‘ra, O‘zbekiston terma jamoasi 3 ta oltin, 2 ta kumush va 2 ta bronza medali bilan Qozog‘iston vakillaridan keyin ikkinchi o‘rinni egalladi.

• Jahon chempionati
• O‘zbekiston
• Shaxmat