Ijtimoiy tarmoqlarda o‘zbek yulduzlari tomonidan yo‘lovchi poyezdlarda konditsioner tizimi ishlamayotganligi haqidagi xabarlarga izoh berildi.

“Mazkur poyezd 12-iyul kuni “Xiva — Andijon” yo‘nalishida harakatlangan. Yo‘l davomida mazkur yo‘lovchi poyezd vagonida texnik nosozlik aniqlangan bo‘lib, yo‘lovchilar vaqtincha boshqa vagonga o‘tkazilgan.

Yo‘lovchilardan sovitish tizimi ishlamayotgan taqdirda vagon kuzatuvchilariga, agar muammoga yechim topilmasa, poyezd boshlig‘iga murojaat qilishlari mumkinligini ta’kidlab o‘tamiz. So‘nggi yillarda yo‘lovchi vagonlar bosqichma-bosqich modernizatsiya qilish ishlari amalga oshirilmoqda va yangi vagonlar ham xarid qilinmoqda.

Yuqoridagi holat bo‘yicha tegishli mas’ul xodimlarga ko‘rsatmalar berildi. Keltirilgan noqulayliklar uchun yo‘lovchilardan uzr so‘raymiz” – deyiladi “O‘ztemiryo‘lyo‘lovchi” AJ xabarida.

Qayd etilishicha, mazkur yo‘lovchi vagon 1991-yilda qurilgan bo‘lib, o‘rnatilgan tartibda o‘z muddatlarida texnik ta’mirlardan o‘tkazilgan. 

Ushbu vagonga o‘rnatilgan sovitish tizimi, texnik shartlariga ko‘ra, tashqi havo harorati +40 darajadan yuqorilab ketganda, tizimning sovitish samaradorligi yo‘qoladi. Hozirgi kunlarda mamlakatimiz hududi bo‘ylab kuzatilayotgan anomal issiq havo harorati tufayli ayrim vagonlarning sovitish tizimlarida nosozliklar kuzatilmoqda. Video lavhaga tushirilgan poyezdning yo‘l davomida havo harorati +40 darajadan yuqorilab ketganligi sababli sovitish tizimining kompressor uskunasi ishlamay qolgan, natijada vagon sovitilmagan. Poyezd Toshkent-Janubiy vokzaliga yetib kelganidan so‘ng, unga qo‘shimcha qilib soz holatdagi vagon ulangan va yo‘lovchilar ushbu vagonga o‘tkazilgan.

"O‘ztemiryo‘lyo‘lovchi" AJ o‘tgan asrlarda ishlab chiqarilgan yo‘lovchi vagonlarni sovitish tizimlari, ichki interyeri, elektr tizimlari bilan bog‘liq muammolarni bartaraf etish uchun kerakli choralarni ko‘rgan holda, sifatli bo‘lgan texnik jihozlarni o‘rnatish ishlari jadallik bilan olib borilayotganligini va vagonlar bosqichma-bosqich modernizatsiya qilinayotganligini, oxirgi 1 yil davomida zamonaviy talablarga mos bo‘lgan 27 ta yo‘lovchi vagonlar xarid qilinganligini ma’lum qiladi.

• O‘ztemiryo‘lyo‘lovchi
• Poyezd