“O‘zbekiston respublika tovar-xom ashyo birjasi” ochiq savdolarida 3-9 yanvar kunlari jami 1 trillion 371,7 mlrd so‘mlik tovar resurslari sotildi. Bu haqida birja matbuot xizmati xabar berdi.
Sotuvchi korxonalar mahsulotlarni tasdiqlangan jadvallarga rioya qilgan holda birja savdolariga qo‘ygan. O‘tgan haftada birja savdolarida 1309 tonna paxta yog‘i sotilgan. O‘tkazilgan savdolarda har kuni o‘rtacha 53 xaridor ishtirok etgan. O‘rtacha kunlik sotuv hajmlari 327 tonnani tashkil qilgan.

Qayd etilishicha, ko‘rib chiqilayotgan davrda barcha navli paxta yog‘ining kunlik o‘rtacha narxlari mahsulotning bir tonnasi uchun 16 442,9 ming so‘mdan 15 350,4 ming so‘mgacha, ya’ni 6,6 foizga pasaygan.

Shuningdek, birjaning shakar bozorida ham narxlar pasayishi qayd etilgan. Hafta davomida birja savdolariga 10 499 tonna shakar qo‘yilgan va ulardan 10 397 tonnasi sotilgan. O‘tkazilgan savdolarda har kuni o‘rtacha 48 xaridor ishtirok etgan.

Ko‘rib chiqilayotgan davrda shakarning barcha kategoriyasi bo‘yicha shakllangan kunlik o‘rtacha narxlar mahsulotning bir tonnasi uchun 8202,1 ming so‘mdan 8007,8 ming so‘mgacha, ya’ni 2,4 foizga pasaygan.

O‘tkazilgan birja savdolari natijasida mahalliy shakarning TS-2 – kategoriyasi bo‘yicha shakllangan o‘rtacha haftalik narxi mahsulotni bir tonnasi uchun 8194,7 ming so‘mni tashkil etgan.

• Birja
• Paxta