2021-yilda 22-dekabr kuni O‘zbekiston Respublikasi Bosh vazirining o‘rinbosari - investitsiyalar va tashqi savdo vaziri Sardor Umurzakov Eron Islom Respublikasining iqtisodiy masalalar bo‘yicha vitse-prezidenti Muhsin Rezaiy bilan videokonferensiya shaklida muzokaralar o‘tkazgan.

Muzokaralar chog‘ida ikki tomonlama iqtisodiy hamkorlikni hozirgi holati va uni kengaytirish istiqbollari muhokama qilinib, investitsiyaviy hamkorlik va o‘zaro savdo sohasiga alohida e’tibor qaratilgan. O‘zbekiston – Eron savdo aylanmasining ijobiy dinamikasi, jumladan, joriy yilning yanvar-noyabr oylarida o‘zaro savdo hajmi 74,4 foizga oshgani mamnuniyat bilan qayd etilgan. Tomonlar O‘zbekiston va Eron o‘rtasida Imtiyozli savdo to‘g‘risidagi bitim loyihasi ustida olib borilayotgan ishlarni kuchaytirishga kelishib olishgan.

Yaqin kelajakda qator ikki tomonlama tadbirlar, jumladan, Savdo-iqtisodiy, ilmiy-texnikaviy hamkorlik bo‘yicha hukumatlararo komissiyaning 14-yig‘ilishi, shuningdek, ikki mamlakat ishbilarmon doiralari vakillari ishtirokida biznes-forum tashkil etish masalalari muhokama qilingan.

Muzokaralar yakunida O‘zbekiston bilan Eron o‘rtasida investitsiyalar, sanoat, savdo va transport sohalarida hamkorlikni kengaytirish bo‘yicha “Yo‘l xaritasi”ni ishlab chiqish va tasdiqlashga kelishilgan.

Davlat statistika qo‘mitasi ma’lumotiga ko‘ra, joriy yilning yanvar-oktyabr oylarida O‘zbekistonning Eron bilan savdo aylanmasi 342,2 million dollarni tashkil etgan. 2020-yilning shu davrida esa mazkur ko‘rsatkich 199 million dollarga teng bo‘lgan edi.

• Eron
• O‘zbekiston