Mamlakatning Tehrondagi elchisi Fariddin Nasriyev Eron-O‘zbekiston qo‘shma savdo palatasi raisi Muso Og‘ai bilan uchrashuv o‘tkazdi. Bu haqda “Dunyo” axborot agentligi xabar berdi.

Qayd etilishicha, muloqot davomida O‘zbekiston-Eron savdo-iqtisodiy, investitsiyaviy hamkorligini yanada kengaytirish va ikki mamlakat ishbilarmon doira vakillari o‘rtasida kooperatsion aloqalarni jadallashtirish masalalari muhokama qilingan.

Muso Og‘ai ikki mamlakat o‘rtasidagi savdo aylanmasi mavjud salohiyatga javob bermasligini va o‘zaro savdoni 1 milliard dollarga yetkazish bo‘yicha barcha imkoniyatlar borligini qayd etgan. Bu yo‘nalishda Eron-O‘zbekiston qo‘shma savdo palatasi barcha sa’y-harakatlarni amalga oshirishga tayyorligini ma’lum qilindi.

“Eron-O‘zbekiston qo‘shma savdo palatasi O‘zbekistonda qishloq xo‘jaligi, qurilish, to‘qimachilik, energetika, tibbiy asbob-uskunalar ishlab chiqarish va boshqa qator muhim sohalarda loyihalarni amalga oshirish uchun eronlik investor va kompaniyalarni jalb etishda ko‘mak ko‘rsatishga tayyor”, – dedi u.

• Elchi
• Eron
• Loyiha