Joriy yilning 15-mart kuni investitsiyalar, sanoat va savdo vaziri Laziz Kudratov Qozog‘iston Respublikasi Savdo va integratsiya vaziri Arman Shakkaliyev bilan muzokaralar o‘tkazdi.

Tomonlar amaldagi ikki tomonlama kelishuvlarning bajarilishi hamda mamlakatlar o‘rtasidagi savdo-iqtisodiy va sarmoyaviy hamkorlikni rivojlantirish bo‘yicha navbatdagi tadbirlarni muhokama qildilar.

Laziz Kudratov Arman Shakkaliyevning O‘zbekistonga tashrifi doirasida bo‘lib o‘tgan “Termiz” xalqaro savdo markazida Qozog‘iston mahsulotlari pavilonining ochilishini yuqori baholadi va pavilonning muvaffaqiyatli ishlashi hamda afg‘on ishbilarmonlari tomonidan unga katta qiziqish bildirilishiga ishonch bildirdi.

O‘zaro tovar ayirboshlash izchil rivojlanib borayotgani qayd etildi. 2024-yilda oziq-ovqat mahsulotlari, to‘qimachilik, rangli metallar, kimyo mahsulotlari va plastmassa mahsulotlari eksporti ko‘paydi hamda tovar ayirboshlash hajmi qariyb 4,3 milliard dollarga yetdi. Tomonlar mahsulot hajmini oshirish, to‘siqlarni bartaraf etish va mahsulotlarni o‘zaro yetkazib berish sharoitlarini yaxshilash bo‘yicha kompleks chora-tadbirlarni qabul qilishga tayyor ekanliklarini tasdiqladilar.

Sarmoyaviy hamkorlik ko‘lami kengaymoqda. O‘zbekistonda Qozog‘iston kapitali ishtirokidagi 1042 ta korxona faoliyat yuritadi, ularning aksariyati ulgurji va chakana savdo, IT-xizmatlari, qurilish, moliya va sug‘urta faoliyati, ko‘chmas mulk bilan bog‘liq operatsiyalar bilan shug‘ullanadi. Ayni paytda Qozog‘istonda O‘zbekiston sarmoyasi ishtirokidagi 4,5 mingdan ortiq kompaniya ro‘yxatga olingan. Tadbirkorlarni o‘zaro asosda tizimli qo‘llab-quvvatlash mexanizmlarini kengaytirish bo‘yicha kelishuvga erishildi.

Uchrashuv yakunlari bo‘yicha tomonlar 2030-yilgacha mamlakatlar o‘rtasidagi tovar ayirboshlash hajmini 10 milliard dollarga yetkazish dasturini imzoladilar hamda 2025-yilda O‘zbekiston va Qozog‘iston hududlari rahbarlarining o‘zaro tashriflari jadvalini tasdiqladilar.

• Hamkorlik
• O‘zbekiston
• Qozog‘iston
• savdo
• tovar