Kecha, 29-dekabr kuni O‘zbekiston va Qozog‘iston bosh vazirlari Abdulla Aripov va Asqar Mamin o‘rtasida videokonferensiya shaklida muzokara o‘tkazilgan.

Tomonlar Shavkat Mirziyoyevning Qozog‘istonga davlat tashrifi va Qozog‘iston Respublikasi Prezidenti Qasim-Jomart Toqayev bilan bo‘lib o‘tgan muzokaralari (6-dekabr), shuningdek, Hukumatlararo qo‘shma komissiyaning 19-yig‘ilishi (26-noyabr) davomida erishilgan kelishuvlarni amalga oshirish jarayonini muhokama qilgan.

Uchrashuvda savdo-iqtisodiy, sarmoyaviy, tranzit-transport, qishloq xo‘jaligi, suv-energetika, sanoat kooperatsiyasi, raqamlashtirish, sog‘liqni saqlash, ta’lim, turizm va boshqa sohalardagi ikki tomonlama hamkorlikning dolzarb masalalari ko‘rib chiqilgan.

Markaziy Osiyodagi mintaqaviy savdoning qariyb 70 foizi Qozog‘iston va O‘zbekiston hissasiga to‘g‘ri keladi. 2021-yilning 10 oyida o‘zaro tovar ayirboshlash hajmi 3,26 milliard AQSh dollarni tashkil etdi, bu 2020-yilning mos davriga nisbatan 29,8 foizga, 2019-yilning 10 oyiga nisbatan 10,6 foizga ko‘pdir.

O‘zaro tovar ayirboshlash hajmini qisqa muddatda 5 milliard AQSh dollarga, o‘rta muddatli istiqbolda esa 10 milliard AQSh dollarga yetkazish vazifasi qo‘yilgan.

“Yil yakunlari bo‘yicha, biz muhim natijalarga, muhim kelishuvlarga erishdik. Mamlakatlarimiz rahbarlarining siyosiy irodasi tufayli Qozog‘iston va O‘zbekiston o‘rtasidagi strategik sheriklik rivojlanishning yuqori sur’atini ko‘rsatmoqda”, — degan. A.Mamin.

• Qozog‘iston