Oʻzbekiston va Qozogʻiston yuk tashish hajmini oshirish boʻyicha kelishuvga erishdi. Bu haqda “Oʻzbekiston temir yoʻllari” AJ xabar berdi.

 

Qozogʻistonning Chimkent shahrida "Oʻzbekiston temir yoʻllari" AJ va "Qazaqstan temіr joli" AJ oʻrtasida "Sariagash" davlatlararo tutashuv punktining yuk oʻtkazish salohiyatini oshirish uchun "Oq koʻprik" va "Sariagash" stansiyalarida texnologik jarayonlarni takomillashtirish boʻyicha muzokaralar boʻlib oʻtdi.

 

Qayd etilishicha, shu yilning avgust oyiga qadar "Oq koʻprik" stansiyasida mavjud boʻlgan qabul qilish va joʻnatish yoʻllarini uzaytirish va qoʻshimcha yoʻllar qurilishi yakunlanadi.

 

Ushbu loyihani amalga oshirish natijasida "Oq koʻprik" chegara punkti orqali oʻtkazish imkoniyati kuniga 30 juft poyezdidan 45 juft poyezdga oshiriladi. Shunga mos ravishda yiliga yuk tashish hajmi 60 million tonnagacha oshishiga erishiladi.

 

Muzokaralar yakunida ikki tomonlama uchrashuv bayonnomasi imzolandi.