Avval xabar qilinganidek, joriy yilning 18-sentabr kuni Moskva shahrida Oʻzbekiston Respublikasi va Rossiya Federatsiyasi hukumat rahbarlari darajasidagi Qoʻshma komissiyaning 4-majlisi boʻlib oʻtdi.

Maʼlumotlarga koʻra, Moskva shahrida Oʻzbekiston Respublikasi va Rossiya Federatsiyasi hukumat rahbarlari darajasidagi Qoʻshma komissiyaning 4-majlisida madaniy-gumanitar yoʻnalishdagi hamkorlik boʻyicha bildirilgan muayyan taklif mohiyati notoʻgʻri talqin qilinmoqda. Bosh vazir matbuot kotibi Bekzod Hidoyatov mazkur holatga munosabat bildirdi.

Unga koʻra, davlatlar oʻrtasidagi oʻzaro rasmiy kelishuvlarga asosan, bir davlat hisobidan boshqa davlat hududida maktab va shunga oʻxshash ijtimoiy obyektlar qurish anʼanasi jahon tajribasida mavjud. Bu oʻzaro ijtimoiy yordam sifatida tasniflanadi.

“Shuni alohida qayd etish lozimki, xorijiy mamlakatlar tomonidan qurib beriladigan maktablarning taʼlim dasturlari dastlab soha mutaxassislari tomonidan milliy urf-odat, qadriyat va anʼanalarimiz, tariximiz, amaldagi qonun hujjatlarimiz, mavjud taʼlim standartlarimiz nuqtai nazaridan chuqur oʻrganib chiqiladi. Agar qurib berilishi taklif etilayotgan maktab va uning dasturi yuqorida nazarda tutilgan talablarga mazmunan mos kelsa, ushbu taʼlim muassasasining faoliyat yuritishi uchun oʻrnatilgan tartibda litsenziya beriladi” – Bekzod Hidoyatov.

“Mazkur jihatlarni inobatga olgan holda, ijtimoiy tarmoq foydalanuvchilaridan asoslanmagan maʼlumotlarni tarqatmasliklarini soʻrab qolamiz”, – deyiladi xabarda.

• Hamkorlik
• Maktab
• Moskva
• Rossiya