O‘zbekiston va Tojikiston o‘rtasidagi do‘stlik va strategik hamkorlik aloqalarini mustahkamlash maqsadida Dushanbe shahrida “Do‘stlik bog‘i” tashkil etilmoqda. Ushbu loyiha ikki davlat o‘rtasidagi ekologik barqarorlik va qishloq xo‘jaligini rivojlantirish yo‘nalishida ham muhim ahamiyatga ega.

Joriy yilning 12-fevral kuni Agrosanoatni rivojlantirish agentligi direktori Tojikiston Respublikasiga tashrif buyurib, Tojikiston Qishloq xo‘jaligi vaziri birinchi o‘rinbosari Asozoda Nuraly Mahmadullo bilan uchrashuv o‘tkazgan. Uchrashuv davomida bog‘ loyihasi muhokama qilinib, amalga oshirish choralari belgilangan. Tashrif davomida rasmiylar Dushanbe shahrida joylashgan “Do‘stlik bog‘i” uchun ajratilgan hududni borib ko‘rib, loyiha bosqichlarini muhokama qilishgan. Uchrashuv yakunida zarur tavsiyalar ishlab chiqilib, shu kuni loyihaning amaliy ishlariga start berilgan.

Qishloq xo‘jaligi vazirligi tizimidagi Agrosanoatni rivojlantirish agentligi tomonidan amalga oshiriladigan ishlar:

Tomchilatib sug‘orish tizimini joriy etish – suvdan samarali foydalanish va ekinlarning yaxshi o‘sishi uchun zamonaviy sug‘orish texnologiyalari o‘rnatiladi.

Ko‘chatlar yetkazib berish – O‘zbekistondan yuqori sifatli Tojikiston iqlimiga moslashtirilgan mevali daraxt ko‘chatlari olib kelinib, ularning barqaror o‘sishini ta’minlash uchun maxsus agrotexnik xizmatlar ham ko‘rsatiladi.

Yer tayyorlash va unumdorlikni oshirish – bog‘ uchun ajratilgan yer maydonida unumdorlikni oshirish ishlari olib boriladi, sifatli o‘g‘itlar bilan ta’minlanadi.

Bog‘ infratuzilmasini yaratish – sug‘orish tizimlari, himoya va parvarish qilish tizimlari, bog‘ dizayni va ekish jarayonlari to‘liq rejalashtiriladi.

Agronomik maslahatlar va tajriba almashish – O‘zbekistondan tajribali mutaxassislar jalb qilinib, Tojikistonlik qishloq xo‘jaligi sohasi vakillari bilan ilmiy-amaliy hamkorlik yo‘lga qo‘yiladi.

• Hamkorlik
• O‘zbekiston
• Tojikiston