O‘zbekiston YeOII mamlakatlari bilan hamkorlikni rivojlantirish niyatida va Yevroosiyo taraqqiyot bankiga a’zo bo‘lishga tayyorlanmoqda. Bu haqda TASS axborot agentligi O‘zbekiston bosh vaziri Abdulla Aripovning Yevroosiyo hukumatlararo kengashi yig‘ilishidagi nutqiga asoslanib xabar bermoqda.

 “Hozirda O‘zbekistonning Yevroosiyo taraqqiyot bankiga qo‘shilish shartlari va tartiblarini kelishish jarayoni davom etmoqda”, – dedi Aripov.

Uning so‘zlariga ko‘ra, O‘zbekistonning tegishli idoralari va Yevroosiyo iqtisodiy komissiyasi departamentlari o‘rtasida yaqin hamkorlik bo‘yicha qo‘shma yo‘l xaritasini muvofiqlashtirish ishlari yakunlanmoqda.

“Biz ushbu hujjatni tasdiqlash va qabul qilishda YeOIIga a’zo davlatlar tomonidan qo‘llab-quvvatlanishiga umid bildiramiz. Shuningdek, hamkasblardan bugungi yig‘ilishda ko‘rib chiqilgan O‘zbekistonning YeOII doirasida amalga oshirilayotgan elektron texnologiyalarni rivojlantirish, temir yo‘l transportini raqamlashtirish, “Agroekspress” logistika loyihasi va iqlim o‘zgarishi bo‘yicha hamkorlik kabi tashabbuslardagi ishtirokini ma’qullashni so‘raymiz”, – deya qo‘shimcha qildi Aripov.

Aripov, shuningdek, joriy yil mart va aprel oylarida Toshkent xalqaro investisiya forumi va “Innoprom: Markaziy Osiyo” xalqaro ko‘rgazmasi bo‘lib o‘tishini ma’lum qildi va Yevroosiyo hukumatlararo kengashi ishtirokchilarini ushbu anjumanga taklif etdi.

• Aripov
• Bosh vazir
• YeOII
• xabar