2021-yil 25-noyabr kuni Oliy Majlis Qonunchilik palatasining Sanoat, qurilish va savdo masalalari qoʻmitasi tomonidan Oʻzbekiston Respublikasi Transport vazirligi huzuridagi Avtomobil yoʻllari qoʻmitasi raisi oʻrinbosari Jamshid Tursunovning “Taʼmirtalab koʻpriklarni taʼmirlash ishlarining amalga oshirilgan holati toʻgʻrisida”gi axboroti eshitildi.

Qayd etilishicha, Oʻzbekistonda yoʻl-transport sohasida soʻnggi besh yil davomida 653 ta yirik koʻprik va yoʻl oʻtkazgichlarning qurilib, 907 ta koʻprik va yoʻl oʻtkazgichlarning rekonstruksiya qilingan va taʼmirlangan.

2021-yil 1-mart holatiga respublikada 14 755 ta koʻprik inshootlari mavjudligi, shundan 3 324 tasi koʻprik inshootlari idoraviy mansub tashkilotlarga biriktirilmaganligi, 1 009 tasi koʻprik inshootlari avariya oldi va avariya holatida ekanligi, 5 930 tasi koʻprik inshootlari taʼmirtalab ahvoldaligi aniqlangan.

Taʼkidlanishicha, amaldagi dasturlarga muvofiq joriy yilda 37 ta umumiy foydalanishdagi avtomobil yoʻllaridagi koʻprik inshootlarida qurish va rekonstruksiya qilish ishlari, 107 ta umumiy foydalanishdagi avtomobil yoʻllaridagi koʻprik inshootlarida kapital va joriy taʼmirlash ishlari, 71 ta shahar koʻchalari va ichki yoʻllardagi koʻprik inshootlarida qurish va rekonstruksiya qilish ishlari, 113 ta shahar koʻchalari va ichki yoʻllardagi koʻprik inshootlarida kapital va joriy taʼmirlash ishlari amalga oshirilmoqda.

Shuningdek, bugungi kunda koʻprik inshootlarini joriy taʼmirlash ishlari boʻyicha 10 dan ortiq meʼyoriy hujjatlar ishlab chiqilib, amaliyotda qoʻllanila boshlangan.

Eshituvda keltrilishicha, bugungi kunda koʻprik va yoʻl oʻtkazgichlar qurilishi sohasida yangi texnologiyalar, jumladan koʻprikning oraliq qurilmasini monolit betondan barpo etish texnologiyasi qoʻllanilmoqda. 

Ushbu texnologiyaning afzalligi koʻprik oraliq qurilmalarini zavod sharoitida yigʻma temir-betondan tayyorlashning oldi olinib, ortiqcha zavod xarajatlari va transport xarajatlarining tejalishiga olib keladi.

• Ko‘prik
• Oliy Majlis