O‘zbekistonda yillik quvvati 190 ming dona bo‘lgan 2 ta yangi yengil avtomobil modelini ishlab chiqarish boshlanadi. Yangi modellarning rusumi bo‘yicha aniqlik kiritilmagan. Bu haqida O‘zbekistonning 2022-2026 yillarga mo‘ljallangan taraqqiyot strategiyasi loyihasida so‘z boradi.

O‘zbekiston avtomobil sanoatida kooperatsiyani yanada rivojlantirish orqali ishlab chiqarish hajmini 1,4 baravarga, eksport hajmini 2 baravarga ko‘paytirish va mahalliylashtirish darajasini oshirish rejalashtirilgan.

Sohadagi mavjud korxonalarning ishlab chiqarish quvvatlarni  oshirish maqsadida:

-yangi birlashgan global platformasiga (GEM) o‘tish orqali yillik quvvati 190 ming dona bo‘lgan 2 ta yangi yengil avtomobil modelini ishlab chiqarishni boshlash;

UzAuto Motors Xorazm viloyati filialining avtomobil ishlab chiqarish quvvatini 70 mingdan 100 mingtaga oshirish rejalashtirilgan.Shuningdek, eksport hajmini 2026-yilga qadar 1 milliard AQSh dollariga yetkazish bo‘yicha “yo‘l xaritasi” ishlab chiqiladi. Bunda:

-ishlab chiqariladigan avtomobillarni xorijiy davlatlarda SKD texnologiyasi asosida ishlab chiqarishni tashkil etish;

“Neksiya” rusumli avtomobillarni Qozog‘istonda to‘liq siklda (CKD) ishlab chiqarishni yo‘lga qo‘yish orqali yiliga 30 ming donagacha mashinokomplektlar eksportini amalga oshirish nazarda tutilgan.

Qolaversa, yengil avtomobillar mahalliylashtirish darajasini 60 foizga yetkazish bo‘yicha “yo‘l xaritasi” ishlab chiqiladi.

Bunda, Andijon viloyatida tashkil qilingan “Mashinasozlik va elektrotexnika maxsus sanoat habi” maxsus sanoat zonasi va boshqa hududlarda avtomobillarga butlovchi qismlar ishlab chiqarishga ixtisoslashgan 151,3 million dollarlik 8 ta yangi loyihalarni 2022-2024 yillarda ishga tushirishni nazarda tutilgan.

• UzAutoMotors