Oʻzbekistonda 2022-yilning yanvar-iyun oylarida ishsizlik darajasi  8,8 foizni tashkil etib, oʻtgan yilning shu davriga nisbatan 0,9 foizga kamaydi. Bu haqda O‘zbekiston Respublikasi bandlik va mehnat munosabatlari vazirligi ma’lum qildi.

2022-yilning iyun oyida Bandlik va mehnat munosabatlari vazirligi huzuridagi Mehnat bozori tadqiqotlari instituti tomonidan respublikamizning 108 ta shahar va tumanlarida navbatdagi ijtimoiy soʻrov oʻtkazildi. Xalqaro mehnat tashkiloti tavsiyalari asosida oʻtkazilgan tadqiqot davomida 500 ta oʻzini-oʻzi boshqarish organlari, 5,0 ming ta uy xoʻjaliklari hamda 26,5 ming nafar fuqarolar qamrab olindi. 

2022-yilning 1-iyun holatida mehnat resurslari soni 19 453,3 ming kishini tashkil etib, 2021-yilning shu davriga nisbatan 100,8 foizga yoki 153,7 ming kishiga oshgan. 

Iqtisodiyot tarmoqlarida band boʻlganlar soni 13 773,6 ming kishini tashkil etib, oʻtgan yilning mos davriga nisbatan 1,9 foizga yoki 261,3 ming kishiga oshgan. 

2022-yilning 1-iyun holatida rasmiy sektorda band aholi soni 6 074,4 ming kishini tashkil qilib, 2021-yilning shu davriga nisbatan yuridik shaxslarda band boʻlganlar soni 4,1 foizga yoki 240,6 ming kishiga oshgani kuzatildi.

Norasmiy sektorda band boʻlganlar soni 5 690,3 ming kishini tashkil etib, oʻtgan yilga nisbatan 8,2 foiz yoki 507,5 ming kishiga kamaygan.

Bunda asosan, norasmiy tarzda faoliyat koʻrsatayotgan fuqarolarning oʻzini-oʻzi band qilgan shaxs sifatida roʻyxatdan oʻtishi hamda boʻsh turgan yerlarni ekin maydonlari sifatida dehqon xoʻjaliklarini tashkil qilish uchun ajratib berilishi hisobiga erishilgan.

Shuningdek, xorijiy davlatlarga ishlash uchun ketganlar 2008,8 ming kishini tashkil etib, oʻtgan yilning mos davriga nisbatan 528,2 ming kishiga oshishi norasmiy bandlarni kamayishiga sabab boʻlgan.

Oʻtkazilgan tadqiqot natijalariga koʻra ishga muhtoj boʻlganlarning umumiy soni 1 326,6 ming kishini, ishsizlik darajasi iqtisodiy faol aholi orasida  8,8 foizni tashkil etdi. 16-30 yoshgacha boʻlganlar orasida ishsizlik darajasi 

14,5 foiz, ayollar orasida ishsizlik darajasi esa 12,8 foiz boʻldi.

2022-yilning 1-iyul holatida respublikamizda iqtisodiy nofaol aholi 4 353,2 ming kishini tashkil etib, oʻtgan yilning mos davriga nisbatan  0,9 foizga yoki 38,8 ming kishiga ortishi kuzatildi. 

Bunda, ishlashni xohlamaydigan yoki darhol ishga joylashishga imkoniyati yoʻqlar oʻtgan yilga nisbatan 183,6 ming kishiga kamaygan boʻlsa, ishlab chiqarishdan ajralgan holda oʻqiyotgan talabalar hamda tugʻruq taʼtilidagi ayollar soni 222,4 ming kishiga oshgan.

• ishsizlik