O‘zbekistonda  2030-yilga borib aholi jon boshiga to‘g‘ri keladigan daromad 4 ming dollardan oshirish rejalashtirilmoqda. Bu haqida O‘zbekistonning 2022-2026 yillarga mo‘ljallangan taraqqiyot strategiyasi loyihasida so‘z boradi.

Qayd etilishicha, iqtisodiyot tarmoqlarida barqaror yuqori o‘sish sur’atlarini ta’minlash orqali kelgusi 5 yilda aholi jon boshiga yalpi ichki mahsulotni — 1,6 barobar va 2030-yilga borib aholi jon boshiga to‘g‘ri keladigan daromad 4 ming dollardan oshirish hamda “daromadi o‘rtachadan yuqori bo‘lgan davlatlar” qatoriga kirishga zamin yaratish rejalashtirilmoqda.

Loyihaga ko‘ra, mamlakatda makroiqtisodiy barqarorlik ta’minlanib, yillik inflyatsiya darajasini bosqichma-bosqich 5 foizgacha pasaytiriladi. Xalqaro moliya institutlari bilan birgalikda kelgusi 5 yil uchun bir nechta ssenariyli makroiqtisodiy prognozlar (makromodel) ishlab chiqiladi.

Shuningdek:

- yalpi ichki mahsulotni 100 mlrd AQSh dollariga yetkazish va aholi daromadlarining yuqori o‘sish sur’atlarini ta’minlash;

- tarkibiy islohotlarni amalga oshirishda iqtisodiyotga ta’sirini baholash;

- iqtisodiy o‘sish uchun zarur bo‘lgan energiya manbalari bilan ta’minlash;

- tashqi bozorlardagi o‘zgarishlarni prognozlashtirish va iqtisodiy o‘sishga tashqi omillar ta’sirini yumshatish ko‘zda tutilgan.

Ma’lum qilinishcha, hududlar va tarmoqlarning iqtisodiy o‘sishdagi hissasini aniqlash orqali “o‘sish nuqtalari” belgilanadi. Barqaror iqtisodiy o‘sishni ta’minlashda tavsiyalar va asosiy makroiqtisodiy yo‘nalishlar bo‘yicha aniq choralar ishlab chiqiladi.

• Loyiha