Oʻzbekistonda 2021-yilning yanvar-sentyabr oylarida ishsizlik darajasi 9,4 foizni tashkil etib, oʻtgan yilning shu davriga nisbatan 1,7 foizga, yanvar-iyun oylariga nisbatan 0,4 foizga kamaygan. Bu haqda Bandlik va mehnat munosabatlari vazirligi maʼlum qildi.

Qayd etilishicha, joriy yilning sentyabr oyida Bandlik va mehnat munosabatlari vazirligining Respublika aholi bandligi va mehnatni muhofaza qilish ilmiy markazi tomonidan respublikamizning 108 ta shahar va tumanlarida navbatdagi ijtimoiy soʻrov oʻtkazilgan. Tadqiqot davomida 500 ta oʻzini-oʻzi boshqarish organlari, 5,0 mingta uy xoʻjaliklari hamda 26,5 ming nafar fuqarolar qamrab olingan.  

2021-yilning yanvar-sentyabr oylarida mehnat resurslari soni 19 322,8 ming kishini tashkil etib, 2020-yilning shu davriga nisbatan 101,1 foizga yoki 201,4 ming kishiga oshgan. Shundan, Iqtisodiyot tarmoqlarida band boʻlganlar soni 13 609,1 ming kishini tashkil etib, mos davriga nisbatan 3,1 foizga (403,9 ming kishiga) oshgan.

2021-yilning yanvar-sentyabr oylarida rasmiy sektorda band aholi soni 6 124,3 ming kishini tashkil qilib,  2020 -yilning shu davriga nisbatan yuridik shaxslarda band boʻlganlar soni 7,9 foizga yoki 450,5 ming kishiga oshgani kuzatilgan. 

Norasmiy sektorda band boʻlganlar soni esa 5 943,9 ming kishini tashkil etib, joriy yilning yanvar-iyun oylariga nisbatan 4,1 foiz yoki 254,0 ming kishiga kamaygan.

Oʻtkazilgan tadqiqot natijalariga koʻra, ishga muhtoj boʻlganlarning umumiy soni 1 413,7 ming kishini, ishsizlik darajasi iqtisodiy faol aholi orasida 9,4 foizni tashkil etgan. 16-30 yoshgacha boʻlganlar orasida ishsizlik darajasi — 14,9 foiz, ayollar orasida ishsizlik darajasi esa — 12,8 foiz boʻlgan.

Joriy yilning yanvar-sentyabr oylarida tuman (shahar) Aholi bandligiga koʻmaklashish markazlariga 842 ming nafar fuqaro ish topishga yordam soʻrab murojaat qilgan. Ularning, 302,0 ming nafari ish bilan taʼminlanib, (joriy yilda 281,3 ming ishsiz aholini ishga joylashtirish belgilangan boʻlib), yillik dastur 107,4 foizga bajarilgan(shuningdek 2020 yilning mos davriga nisbatan 124 foizga oshdi). 

Xususan, sanoat sohasiga 62 ming, xizmat koʻrsatish va servis sohasiga 73,5 ming, qishloq xoʻjaligi sohasiga 28,4 ming, boshqa byudjet korxonalariga 138 ming nafar ishsizlar ishga joylashtirilgan. Murojaat qilgan fuqarolarning 203 ming band boʻlmagan aholi haq toʻlanadigan jamoat ishlariga jalb etilgan va ularning ish haqi uchun 177 mlrd. soʻm mablagʻ toʻlab berilgan. 

Jumladan, 163,6 ming nafar ishsizlar tuman (shahar) aholi punktlari, mahallalar va boshqa hududlarni obodonlashtirish ishlariga, 21 ming qishloq xoʻjaligi ishlariga, 10,7 ming byudjet korxonalariga,  4,6 ming sanoat va xizmat koʻrsatish korxonalariga, 17,1 ming boshqa yoʻnalishlarda tashkil etilgan jamoat ishlariga jalb etilgan.

Bundan tashqari, 93,5 ming nafar ishsizlarga 81,9 mlrd. soʻm ishsizlik nafaqasi tayinlangan va toʻlab berilgan.

• Vazirlik
• statistika