O‘zbekistonda bola parvarishlaganlik davrini mehnat stajiga qo‘shib hisoblash tartibi belgilanmoqda. Bu haqida Oliy Majlis Qonunchilik palatasi matbuot xizmati xabar berdi.

Ma’lum qilinishicha, Qonunchilik palatasining majlisida “Fuqarolarning davlat pensiya ta’minoti to‘g‘risida”gi O‘zbekiston Respublikasi Qonuniga hamda “O‘zbekiston Respublikasining Mehnat kodeksiga o‘zgartish va qo‘shimchalar kiritish haqida”gi qonun loyihasi birinchi o‘qishda muhokama qilingan.

Ta’kidlanishicha, qonun loyihasi bilan boquvchisini yo‘qotganlik pensiyasi to‘lovlarini marhumning qaramog‘idagi farzandlariga to‘lash belgilanmoqda. Boquvchisini yo‘qotganlik pensiyasi farzand 18 yoshgacha, agar umumiy o‘rta ta’lim muassasasi, akademik lisey va oliy ta’lim muassasasida o‘qiyotgan bo‘lsa 23 yoshga to‘lgunga qadar to‘lanishi nazarda tutilgan.
Shuningdek, qonun loyihasida nogironligi bolalikdan bo‘lgan bolalarga 18 yoshgacha qaragan davrini ish stajiga qo‘shib hisoblash taklif qilingan. Bundan tashqari, bolani parvarishlash vaqtining hammasini jamlanganda ko‘pi bilan 6 yillik davrni ish stajiga qo‘shib hisoblash belgilanmoqda.

“Ushbu qonun loyihasi juda xalqchil hujjat hisoblanadi. Bolani parvarishlash vaqtini stajga qo‘shishning taklif etilayotgani ayollarimizni qo‘llab-quvvatlashga xizmat qiladi”, — degan Qonunchilik palatasi deputati O‘rol O‘rozboyev.

Qayd etilishicha, qonun loyihasi bilan respublika hududida karantinli va inson uchun xavfli bo‘lgan boshqa yuqumli kasalliklar tarqalishi tahdidi mavjud bo‘lgan davrda pensiya olish huquqi vujudga kelgan fuqarolarga pensiya uni olish huquqi paydo bo‘lgan sanadan tayinlash taklif etilmoqda. Ushbu tartib keltirilgan tadbirlar (cheklovlar) davrida yoki tugagandan so‘ng bir oy ichida pensiya tayinlashni so‘rab murojaat etgan taqdirda amalga oshiriladi.

• Qonunchilik palatasi
• pensiya