O‘zbekistonda 2021-yil mobaynida davlat xaridlari bo‘yicha bir milliondan ortiq bitimlar tuzilgan. Respublika tovar-xom ashyo birjasining xabar qilishicha, ushbu xaridlarni amalga oshirish uchun jami 11,0 trillion so‘mlik mablag‘ sarflangan.

Shuningdek, 2021-yildagi bitimlar hajmi 2,6 baravar o‘sgan bo‘lib, ularning soni 2020-yilga nisbatan 33,6 foizga ko‘pdir. Amalga oshirilgan elektron davlat xaridlarining 60 foizi korporativ buyurtmachilar, 40 foizi esa byudjet buyurtmachilari tomonidan amalga oshirilgan.

Ma’lum qilinishicha, eng ko‘p davlat xaridi quyidagi sohalarda bo‘lgan:

- sog‘liqni saqlash sohasida – 1 trillion 102,5 milliard so‘m;
- oliy va o‘rta maxsus ta’lim tizimida – 504,1 milliard so‘m;
- xalq ta’limi tizimida – 356,3 milliard so‘m.

Hududlar bo‘yicha qaralganda esa eng yirik bitimlar Toshkent shahri va Toshkent viloyati (41,9%), Navoiy (13,2%), Farg‘ona (5,7%) va Samarqand (5,4%)  viloyatlarida tuzilgan.

Bundan tashqari, xabarda Davlat xaridlarini elektron savdo tizimi – xarid.uzex.uz’da amalga oshirish hisobiga 1,7 trillion so‘mlik byudjet va korporativ buyurtmachilar mablag‘lari tejalganligi ham aytib o‘tilgan.

Ma’lumot o‘rnida, xarid.uzex.uz yagona portali O‘zbekiston tovar-xom ashyo birjasi tomonidan joriy etilgan bo‘lib, bundan maqsad buyurtmachi va yetkazib beruvchilarning davlat xaridlarida ishtirokini soddalashtirish hisoblanadi. Mazkur portalda davlat xaridlarining barcha turlari birlashtirilgan va mahsulotlarning barcha parametrlarini aks ettiruvchi tovarlar va xizmatlarning yagona klassifikatori joriy qilingan. Foydalanuvchilar davlat xaridlari bo‘yicha yagona portalida bir marotaba ro‘yxatdan o‘tib, birjaning hisob-kitob kliring palatasida yagona hisobvarag‘idan foydalanishlari mumkin.

• Toshkent