“Milliy tiklanish” demokratik partiyasi fraksiyasining navbatdagi yig‘ilishida partiya a’zolari “Alkogol va tamaki mahsulotlarining tarqatilishi hamda iste’mol qilinishini cheklash to‘g‘risida”gi qonun loyihasini muhokama qilishdi.

Unda deputatlar tamaki va alkogol mahsulotlarining sog‘liq uchun zararlari haqida so‘z yuritib, ayni paytda yoshlar orasida ommalashib borayotgan elektron sigaretalar va nikotinli snyuslarni taqiqlash taklifini ko‘rib chiqdilar.

Partiya matbuot xizmatining Respublika salomatlik va tibbiy statistika instituti ma’lumotlariga tayanib ma’lum qilishicha, O‘zbekistonda har yili 30 mingga yaqin kishi aynan chekish bilan bog‘liq kasalliklar tufayli olamdan o‘tadi. 

Shuningdek, mamlakatda jami erkaklarning 23 foizi, ayollarning esa 1 foizi chekuvchilar hisoblanadi.

Yig‘ilishda ushbu qonun loyihasining muhokamasi qizg‘in o‘tgan va fraksiya a’zolarining barchasi qonun loyihasida elektron sigaretalarni taqiqlash bo‘yicha qat’iy cheklov kiritishni taklif qilgan.

– Dunyoning 32 mamlakatida elektron sigaretalar cheklangan ekan, nima uchun biz cheklamasligimiz kerak. Mutaxassislar uning genofondga jiddiy ta’sir ko‘rsatishini aytmoqda. Partiyamiz ham ushbu masalani muntazam ko‘tarib keladi. Kim nima desa desin, ushbu qonun loyihasiga elektron sigaretalarni qat’iy taqiqlash bo‘yicha cheklov kiritilmas ekan, biz ushbu qonunning qabul qilinishiga qarshi ovoz beraveramiz, – dedi fraksiya rahbari Alisher Qodirov.

Ushbu taklif bir ovozdan qo‘llab-quvvatlandi va qonun loyihasi qo‘mitaga qaytarildi.

Ma’lumot uchun, ayni paytda Jahon sog‘liqni saqlash tashkiloti elektron sigaretalarni butunlay taqiqlash yoki tamaki mahsulotlariga qo‘llaniladigan qat’iy choralar orqali vaziyatni tartibga solishni taklif etmoqda. Hozircha dunyoning 32 mamlakatida elektron sigaretalarni sotish taqiqlangan.

• Loyiha
• Qonunchilik palatasi