O‘zbekistonda futzal va sohil futbolini rivojlantirish uchun alohida federatsiyalar tashkil qilinadi. Shu vaqtga qadar ular O‘FA tasarrufida edi.

“O‘zbekiston futzal milliy jamoasining yurtimiz mezbonlik qilgan Jahon chempionatidagi ishtiroki O‘FA rahbariyati tomonidan tanqidiy ruhda ko‘rib chiqilgandi. Mazkur natija futzalni rivojlantirish va ommalashtirishning yangi mexanizmini ishlab chiqishni talab etardi.

Noyabr oyi davomida O‘FA mazkur masalani to‘liq o‘rganib chiqib, 2025-yildan boshlab bu borada qanday amaliy ishlar olib borilishi yuzasidan yakuniy qarorga keldi. Uning dastlabki bosqichida professional va havaskorlar futzalni hamjihatlikda rivojlantirish, shu asosida mamlakat milliy jamoalarini shakllantirish, chempionat o‘yinlarida raqobatni kuchaytirish, klublar darajasini oshirish lozimligi qayd etildi.

Bu tajriba muvaffaqiyatli amalga oshirilganini 2000 yillar avvalida tuzilgan futzal assotsiatsiyasi misolida eslab o‘tish mumkin. O‘shanda assotsiatsiyasining faol tashabbuslari natijasida yurtimizda futzal jadallik bilan rivojlangan va natijalar yaxshilangan.

O‘FA Ijroiya qo‘mitasining joriy yil 12 dekabr sanasidagi yig‘ilishi bayoniga asosan, mamlakat futzali va sohil futboli uchun javobgar alohida tashkilot (federatsiya) tuzish masalasi belgilandi. Ayni vaqtda O‘FA tegishli tartibda uni tashkil etish va davlat ro‘yxatidan o‘tkazish bilan bog‘liq ishlarni amalga oshirmoqda. Bu masalaga oid barcha tafsilotlar O‘FA rasmiy sahifalari orqali yoritib boriladi”, — deb yozmoqda O‘FA matbuot xizmati.

• Futzal
• Yangilik