Prognozlashtirish va makroiqtisodiy tadqiqotlar instituti (PMTI) ekspertlari go‘sht yetishtirish tufayli havoga qancha СO2 (karbonat angidrid) chiqarilishini baholadi. Bu haqida institut matbuot xizmati xabar berdi. 

Ma’lum bo‘lishicha, 2020-yilda O‘zbekiston Respublikasida go‘sht yetishtirish tufayli havoga СO2 (karbonat angidrid) ekvivalentida 123,9 million tonna chiqindi chiqarilgan. Xususan, 2000-yil bilan taqqoslaganda chiqarilayotgan issiqxona gazlari (IG) hajmi salkam 3 barobar oshgan. Shuningdek, 2020-yilda chiqarilgan issiqxona gazlari tarkibida eng katta ulush mol go‘shtining hissasiga to‘g‘ri kelgan – 92,8%. 

Ta’kidlanishicha, tadqiqot davomida Jozef Pur va Tomas Nemechekning 2018-yilda Science jurnalida chop etilgan, global oziq-ovqat tizimining eng yirik meta-tahlili ma’lumotlaridan foydalanilgan. Bu tadqiqotda dunyoning 119 ta mamlakatidagi 38 mingdan ortiq tijorat fermasiga oid ma’lumotlar ko‘rib chiqilgandi. 

Ma’lum qilinishicha, o‘simliklar asosida tayyorlanuvchi ozuqaning uglerod izi go‘sht va sut mahsulotlarinikiga qaraganda ancha kam. Bundan tashqari, o‘simliklar asosida tayyorlangan mahsulotlar hosil qiluvchi chiqindilar jonivorlar asosida tayyorlanuvchi mahsulotlar chiqindisidan o‘rta hisobda 10-50 marotaba kam ekan. 

• Ob_havo
• tadqiqot