O‘zbekistonda ilk bor Janubiy Koreyaning Meere kompaniyasi tomonidan ishlab chiqarilgan robot-xirurg yordamida murakkab jarrohlik amaliyotlari o‘tkazildi. Bu haqda Sog‘liqni saqlash vazirligi axborot xizmati xabar berdi.

Qayd etilishicha, zamonaviy tibbiyotning bu imkoniyatidan unumli foydalanish maqsadida Koreyaning Meere kompaniyasi tomonidan ishlab chiqarilgan Revo-i rusumli robot-xirurg O‘zbekistonga olib kelingan.

Shuningdek, Toshkent shahri Yakkasarov tumanida joylashgan Shox International Hospital klinikasida o‘rnatilgan O‘zbekiston, balki Markaziy Osiyoda ham noyob bo‘lgan ushbu texnologiya yordamida bir haftada 8 nafar bemorda o‘tkazilgan murakkab turdagi jarrohlik amaliyoti muvaffaqiyatli yakunlanib, dardiga davo topgan. Bunday operasiyani birinchilardan bo‘lib AQSH 2000 yilda o‘tkazgan.

Mazkur klinikada 28-sentyabr, chorshanba kuni Sog‘liqni saqlash vazirligi mutasaddilari, Koreyaning Meere kompaniyasi vakillari, ixtisoslashtirilgan ilmiy-amaliy tibbiyot markazlari rahbarlari, bir qator malakali professor-shifokorlar va jamoatchilik faollari ishtirokida o‘zbek tibbiyoti tarixidagi muhim voqea — O‘zbekistonda ilk bor robot-xirurg texnologiyasi ish boshlashiga bag‘ishlangan tantanali marosim bo‘lib o‘tgan.

Klinika mutasaddilari ushbu innovasion texnologiya muassasadagi barcha operasion blok mutaxassislari tomonidan o‘zlashtirilishini maqsad qilgan.

Negaki, operasiyada butun jamoa ishtirok etadi, amaliyot natijasi va bemor salomatligi har birining kasbiy mahoratiga bog‘liq. Keyinchalik esa bu mutaxassislar O‘zbekistondagi boshqa hamkasblari bilan o‘z tajribalarini bo‘lishishi ko‘zda tutilgan.

Robot-xirurg yordamida bajariladigan onkologik amaliyotlar o‘simta yana takrorlanmasligi uchun uni butunlay olib tashlashi, asab tugunlariga va bemor hayoti uchun muhim bo‘lgan boshqa organlarga ta’sir qilmasligi, minimal qon yo‘qotish bilan kechishi, bemorning amaliyotdan keyingi tiklanishi hamda butkul sog‘ayishini tezlashtirishi bilan katta ahamiyatga egaligi ta’kidlangan.

Mutaxassislarning ta’kidlashicha, O‘zbekistonda robotoxirurgiyaning taraqqiy etishi ikki omilga bog‘liq. Birinchisi — texnologiyani boshqara oladigan mutaxassislar tayyorlash bo‘lsa, ikkinchisi — mamlakat tibbiyotida robotlar sonining ortishi ma’lum qilingan.

Bu borada dastlabki qadam tashlangani endigi vazifa — robot bilan birga operasiya qiluvchi ko‘p sonli xirurglar zaxirasini shakllantirish va innovasion texnologiya onkologiya va onkourologiya yo‘nalishlaridagina emas, milliy tibbiyotimizning barcha jabhalarida faol qo‘llash maqsadi ko‘zlangani aytilgan.

• Jarrohlik
• SSV
• robot