Oʻzbekistonda yanvar oyidagi ishsizlik darajasi 9,6 foizni tashkil etdi. Bu haqida Bandlik va mehnat munosabatlari matbuot xizmati xabar berdi.

Qayd etilishicha, Oʻzbekistonda 2022-yilning 1-yanvar holatida ishsizlik darajasi 9,6 foizni tashkil etib, 2021-yilning shu davriga nisbatan 0,9 foizga kamaygan. Shu bilan birga, 2021-yilning yanvar-sentyabr oylariga nisbatan 0,2 foizga ortgan.

Ma’lum qilinishicha, 2021-yilning dekabr oyida Bandlik va mehnat munosabatlari vazirligi huzuridagi Mehnat bozori tadqiqotlari tomonidan respublikaning 108 ta shahar va tumanlarida navbatdagi ijtimoiy soʻrov oʻtkazilgan. Tadqiqot davomida 500 ta oʻzini-oʻzi boshqarish organlari, 5,0 mingta uy xoʻjaliklari hamda 26,5 ming nafar fuqarolar qamrab olingan.

Shuningdek, 2022-yilning 1-yanvar holatida mehnat resurslari soni 19 million 345,0 ming kishini tashkil etib, 2020-yilning shu davriga nisbatan 101,1 foizga yoki 202,6 ming kishiga oshgan. Iqtisodiyot tarmoqlarida band boʻlganlar soni 13 million 538,9 ming kishini tashkil etib, 2021-yilning mos davriga nisbatan 2,3 foizga (299,3 ming kishiga) oshgan.

Bundan tashqari, 2022-yilning 1-yanvar holatida rasmiy sektorda band aholi soni 6196,3 ming kishini tashkil qilib, 2020-yilning shu davriga nisbatan yuridik shaxslarda band boʻlganlar soni 6,3 foizga yoki 314,8 ming kishiga oshgani kuzatildi.

Xususan, nnorasmiy sektorda band boʻlganlar soni 5 million 885,5 ming kishini tashkil etib, 2021-yilning 1-oktyabr holatiga nisbatan 1,0 foiz yoki 58,4 ming kishiga kamaygan. Oʻtkazilgan tadqiqot natijalariga koʻra ishga muhtoj boʻlganlarning umumiy soni 1 million 441,8 ming kishini, ishsizlik darajasi iqtisodiy faol aholi orasida 9,6 foizni tashkil etdi. 16-30 yoshgacha boʻlganlar orasida ishsizlik darajasi – 15,1 foiz, ayollar orasida ishsizlik darajasi esa 13,3 foiz boʻldi.

• Bandlik
• Mehnat
• Mehnat_vazirligi
• ishsizlik