O‘zbekistonda keyingi 5 yil davomida 1386 kilometr magistral suv tarmoqlari kapital ta’mirlanadi. Bu haqda 2022-2026 yillarga mo‘ljallangan taraqqiyot strategiyasini 2022-yilda amalga oshirish bo‘yicha “yo‘l xaritasi” loyihasida so‘z boradi.

Loyihaga ko‘ra, suv yo‘qotish darajasi yuqori bo‘lgan 11 ta yirik shaharlarga (Toshkent, Samarqand, Buxoro, Namangan, Farg‘ona, Navoiy, Jizzax, Qarshi, Nukus, Urganch va Chirchiq shaharlarida) sun’iy yo‘ldosh orqali yo‘l qoplamalarini buzmasdan hamda yo‘l infratuzilmalariga zarar yetkazmasdan suv sirqish nuqtalarini aniqlash va har yili isrof bo‘layotgan 41,4 million kub metr ichimlik suvini tejash reja qilingan.

Qayd etilishicha, respublikaning barcha shahar va tumanlarida jami 4629 kilometr magistral suv tarmoqlari ta’mirtalab bo‘lib, 5 yil davomida 1386 kilometr qismini yo‘l qoplamalarini buzmasdan va yo‘l infratuzilmalariga zarar yetkazmasdan kapital ta’mirlanadi.

Shuningdek, respublikaning barcha shahar va tumanlarida jami 1919 kilometr oqova suv tarmoqlari ta’mirtalab bo‘lib, 5 yil davomida 960 kilometr qismini yo‘l qoplamalarini buzmasdan va yo‘l infratuzilmalariga zarar yetkazmasdan kapital ta’mirlanadi.

Bundan tashqari, respublikada yiliga 1,6 milliard kub metr toza ichimlik suvi ishlab chiqarilib, suvni yetkazib berish jarayonida isrof qilinadigan 469,8 million kub metr (31,2 foiz) suvni tejash choralarini ko‘riladi. Bunda ko‘riladigan yillik 272,5 milliard so‘mga teng moliyaviy zararni bartaraf etiladi.

Shuningdek, kommunal sohaga transfer qilingan Isroil texnologiyasini Toshkent shahri, Samarqand viloyati Urgut tumani va Andijon shahrida orttirilgan tajriba asosida 2022-yildan respublikaning boshqa hududlarida ham qo‘llash choralari ko‘riladi.

• Loyiha