O‘zbekistonda 2,6 mln.dan ortiq fuqaro o‘zini o‘zi band qilgan shaxs sifatida ro‘yxatga olingan. Shundan 284 ming nafari joriy yilda ro‘yxatdan o‘tgan.

O‘zini o‘zi band qilgan shaxslar daromadi 100 mln so‘mdan oshmasa, soliq to‘lamaydi. Ish stajiga ega bo‘lish va pensiya hisoblash uchun ular ixtiyoriy ravishda yiliga bir marta ijtimoiy soliq to‘lashi mumkin. Shu maqsadda joriy yilda 68,5 ming nafar o‘zini o‘zi band qilgan shaxs tomonidan 21,7 mlrd so‘m ijtimoiy soliq to‘langan.

Yo‘lovchi tashish transporti tizimini rivojlantirish, ushbu yo‘nalishda ko‘rsatilayotgan xizmatlar sifatini oshirish, ishsizlikni qisqartirish maqsadida yo‘lovchilarni yengil avtotransport vositalarida tashish faoliyati o‘zini o‘zi band qilgan shaxslar shug‘ullanishi mumkin bo‘lgan faoliyat turlari ro‘yxatiga kiritilgan.

Umumiy hisobda 1-mart holatiga o‘zini o‘zi band qilgan haydovchilar 420,8 ming nafarni tashkil etadi. Ularning 161,5 ming nafardan ortig‘i soliq organlari bilan integratsiyalashgan onlayn-agregatorlar orqali yo‘lovchi tashish xizmatlarini ko‘rsatmoqda. E’tiborlisi, ayollarning bu sohaga qiziqishi ortib bormoqda: 1 053 nafar haydovchi ayol ushbu onlayn xizmatlar orqali yo‘lovchi tashish bilan shug‘ullanmoqda.

Onlayn-taksi agregatorlaridan foydalanadigan haydovchilar:
– 30 yoshgacha – 59 274 nafar;
– 30 yoshdan 50 yoshgacha – 90 420 nafar;
– 50 yoshdan oshganlar – 11 970 nafar.

Soliq qo‘mitasi ma’lumotlar bazasida mavjud ma’lumotlarga ko‘ra, o‘zini o‘zi band qilgan haydovchilar joriy yilning dastlabki 2 oyida onlayn-agregatorlar yordamida quyidagi miqdorlarda daromad olgan:

1 mln so‘mgacha – 104 241 nafar;
1 mln.dan 2 mln so‘mgacha – 24 350 nafar;
2 mln.dan 5 mln so‘mgacha – 23 817 nafar;
5 mln.dan 10 mln so‘mgacha – 7 887 nafar;
10 mln.dan 15 mln so‘mgacha – 1 180 nafar;
15 mln so‘mdan yuqori – 189 nafar.

Faoliyatini qonuniylashtirish o‘zini o‘zi band qilgan shaxslarga nafaqat qonuniy daromad olish, balki ijtimoiy-iqtisodiy va huquqiy manfaatlariga ham xizmat qiladi.

• Ayollar
• Haydovchi
• Soliq