“O‘zgidromet” axborot xizmati rahbari Munisa Asilxo‘jayeva bugun va ertaga (29-30-noyabr kunlari) O‘zbekiston hududi bo‘yicha quyoshli va ochiq kun bo‘lishi kutilayotganini ma’lum qildi. Ma’lum bo‘lishicha, tushdan so‘ng havo 12-17 daraja iliqgacha isiydi, kechalari havo harorati 3-6 daraja iliqni tashkil etadi.

Qishning birinchi kunlarida anomal iliq ob-havo kuzatiladi, 1-2-dekabrda horijiy janubiy hududlardan iliq havo massalari kirib kelishi kutilmoqda, harorat kechalari 6-9 daraja iliqgacha, kunduz kunlari 17-22 daraja iliqgacha ko‘tariladi, bu dekabr oyi boshi uchun bo‘lgan me’yordan 8-11 darajaga yuqoridir.

Faqat 2-dekabrda shimoliy hududlarga biroz nam va salqin havo massalari kirib kelishi kutilmoqda, buning hisobiga Qoraqalpog‘istonda va Xorazm viloyatida ba’zi joylarda yomg‘ir yog‘ishi mumkin.

3-dekabrda havo massalarining kirib kelishi respublikamizning qolgan hududlariga tarqaladi. Respublikaning ayrim tumanlarida (shimoliy hududlar va Farg‘ona viloyatidan tashqari) biroz yomg‘ir yog‘ishi ehtimoli istisno emas. 3-dekabrda harorat foni nisbatan pasayadi, lekin hali ham me’yordan yuqori bo‘ladi. Kunduz kunlari havo harorati 13-18 daraja iliqni tashkil etadi.

• Ob-havo
• O‘zbekiston
• O‘zgidromet