O‘zbekistonda qolayotgan afg‘onistonlik qochqinlar yurtiga majburan qaytarilmaydi – Ismatilla Ergashev
Tolibon hukumati esa qochqinlar qaytsa va davlatiga xizmat qilsa, ularni kechirishini aytgan.

Bugun, 17-dekabr kuni AOKAda BMTning Qochoqlar ishlari bo‘yicha Oliy komissari boshqarmasining Termiz shahridan Mozori-Sharifga gumanitar yordamini yetkazish jarayonlari yuzasidan bo‘lib o‘tgan matbuot anjumanida  O‘zbekistonning Afg‘oniston bo‘yicha maxsus vakili Ismatilla Ergashev afg‘on qochoqlari haqida to‘xtalib o‘tdi. 

–  O‘zbekiston hududida yashab kelayotgan afg‘onistonliklarni majburiy ravishda, kuch bilan qaytarish rejada yo‘q. Shu bilan birgalikda, aniqlik kiritib o‘tishni istardim, hozirda Termiz shahrida afg‘on qochqinlarining ommaviy ravishda yashab kelayotganlari yo‘q, ya’ni maxsus lagerlar yo‘q. 
14-15 avgust kunlari bevosita Amudaryodan kechib o‘tgan taxminan 150 nafar afg‘on qochqinlari bor edi. Ma’lumki, bir qancha afg‘onlar xorij mamlakatlariga chiqib ketishdi. Lekin bizning hududimizga o‘tgan 150 nafar afg‘onlarning moliyaviy imkoniyatlari juda tor. Ularning oilalari, farzandlari Afg‘onistonda qolib ketgan. Ular aytishyaptiki, Tolibon hukumati ularning xavfsizligini ta’minlab berishsa. Ular o‘zlariga nisbatan tazyiq va zo‘ravonlik bo‘lmasa, mamlakatlariga qaytish niyatida ekanliklarini aytishmoqda. Chunki ularning, yuqorida aytganimizdek, AQSh yoki Yevropaga ketishga moliyaviy imkoniyatlari yetmaydi, – dedi Ismatulla Ergashev.

Shuningdek, Ismatulla Ergashev O‘zbekistonda qolayotgan afg‘onistonlik qochqinlar yurtiga majburan qaytarilmasligini ma’lum qildi. Bundan tashqari Tolibon hukumati ham qochqinlar qaytsa va davlatiga xizmat qilsa, ularni kechirishini aytgan.

–  Men Tolibon rahbarlari bilan gaplashdim. Ular ushbu qochqinlarni agar vatani, xalqi uchun xizmat qilishga tayyor bo‘lishsa, ular avf etilishi haqida va’da berishdi. Dastavval ishonch kamroq bo‘lgani uchun kichik guruhlarda o‘tkazdik va kuzatdik. Haqiqatda ularga nisbatan hech qanday zug‘um bo‘lmagani, siquvga olinmaganiga guvoh bo‘ldik. Shu tariqa barcha 150 nafar afg‘onni o‘z mamlakatiga o‘tkazib yubordik.
O‘zbekiston hududida yashab kelayotgan afg‘onlarga esa tegishlicha turli xalqaro institutlar boshqa davlatlardan qochoq maqomini olishlari uchun yordam beradi. O‘zbekiston hukumati esa ularning orasidagi viza olish huquqi bo‘lganlariga ko‘maklashadi. Ya’ni vizasi tugaganlar majburiy ravishda mamlakatdan chiqarib yuborilmaydi, – dedi Ergashev.

• Afg‘oniston
• O‘zbekiston
• Toliblar