O‘zbekistondagi bozorlarda shakarning chakana narxi 12 000-13 500 so‘mgacha tushdi va hozirda shakar zavodlarida 389 ming tonna shakar mahsuloti resurslari mavjud. Bu haqda Raqobatni rivojlantirish va isteʼmolchilar huquqlarini himoya qilish qo‘mitasi maʼlumotlariga tayanib Sputnik xabar bermoqda.

Qayd etilishicha, bugungi kunda ichki bozorlarda shakarning chakana narxi 12 000-13 500 so‘mgacha tushgan. Yil boshiga (13 500 – 14 500 so‘mni) nisbatan 10 foizga pasaygan.

“Bugungi kunda mahalliy shakar zavodlari shakar xomashyosini Braziliya davlatidan xarid qilishmoqda. Xususan, 3 iyul holatiga mazkur zavodlarda 389 ming tonna shakar mahsuloti resurslari mavjud hamda arzon narxlarda xomashyo yetkazib berish bo‘yicha uzoq muddatli shartnomalar imzolangan”, — deyiladi xabarda.

Shundan, omborda 3 ming tonna tayyor shakar va 72 ming tonna xomashyo, avgust oyiga qadar 314 ming tonna xomashyo yetkazib beriladi.

Respublikada shakar ishlab chiqaruvchi zavodlar imkoniyati

Hozirda “Xorazm shakar” MCHJ va “Angren shakar” MCHJning yillik umumiy ishlab chiqarish quvvati 900 ming tonnadan ortiq. Korxonalarning ichki ehtiyojni (o‘rtacha 650 ming tonna) 138 foizdan ortig‘ini qoplash imkoniyati mavjud.

Birja savdolariga qo‘yilayotgan shakar holati

Bugungi kunda (3 iyul) birja savdolarida kunlik qo‘yilayotgan 2600 tonna shakar mahsulotining 2100 tonna yoki 68 foizi 1 kg uchun o‘rtacha 10 666 so‘mdan realizatsiya qilinib, o‘rtacha boshlang‘ich narxga (11 001 so‘m) nisbatan o‘sish 3 foizni tashkil etmoqda.

Mahalliy korxonalar tomonidan joriy yil yanvar-iyun oylarida birja savdolariga jami 336,7 ming tonna shakar qo‘yilib, ulardan 280,1 ming tonna (83 foizi) sotilgan.

Iyun oyida shakarning 1 tonnasi uchun o‘rtacha sotilish narxi spot bitimlarida 11,5 million so‘mgacha (may oyida – 13,3 million so‘m) o‘rtacha 14 foizga va forvard bitimlarida 10,7 million so‘mgacha (may oyida – 12,5 million so‘m) o‘rtacha 15 foizga pasayganligi kuzatilmoqda.

Statistika agentligiga ko‘ra, yanvar-may oylarida jami yirik korxonalar tomonidan 265,1 ming tonna shakar ishlab chiqarilgan. Mazkur ishlab chiqarish 2022 yilning tegishli davriga nisbatan 2,2 % ga oshgan.

May oyining o‘zida yirik korxonalar tomonidan 62,7 ming tonna shakar ishlab chiqarildi.

Yanvar oyida dehqon bozorlarida shakarning narxi (1 kg) 11 000 – 14 000 so‘mga teng bo‘lgan.

• Chakana savdo
• Shakar