Oxirgi 3 yilda 339,7 million dollar mablagʻ oʻzlashtirilib, 497 km. uzunlikdagi umumiy foydalanishdagi avtomobil yoʻllari sementbeton qoplama bilan rekonstruksiya qilingan. Bu haqida Iqtisodiy taraqqiyot va kambagʻallikni qisqartirish vazirligi Matbuot xizmati xabar berdi.

Unga koʻra, respublika hududida 2018-2021 yillar davomida jami 19,8 trillion soʻm mablagʻ hisobiga 45,3 ming km.dan ortiq umumiy foydalanishdagi avtomobil yoʻllari va xoʻjaliklararo ichki yoʻllarda qurish, rekonstruksiya qilish, taʼmirlash va saqlash ishlari olib borilgan.

Jumladan:

A-380 “Gʻuzor–Buxoro–Nukus–Beyneu” avtomobil yoʻlining 125 km qismi;

A-373 “M-39 avtoyoʻli–Guliston–Boʻka–Angren–Qoʻqon va Andijon orqali–Oʻsh” avtomobil yoʻlining Qamchiq dovonidan oʻtgan 58 km qismi sementbeton qoplama qurgan holda rekonstruksiya qilingan;

M-39 “Olmaota–Bishkek–Toshkent–Termiz” avtomobil yoʻlining 115 km qismi asfaltbeton qoplama qurgan holda rekonstruksiya qilingan;

A-373 “Toshkent–Oʻsh” avtomobil yoʻlining 208–274 km. qismini aylanib oʻtishda Sirdaryo daryosi ustiga 250 km. uzunlikdagi koʻprik qurilgan;

Shuningdek, Toshkent viloyatining Qibray va Yuqorichirchiq tumanlaridan oʻtuvchi 19,2 km. uzunlikdagi yangi yoʻnalishdagi avtomobil yoʻli qurilgan.

Bundan tashqari, sohaga xalqaro moliya institutlari, jumladan, Osiyo taraqqiyot banki, Jahon banki, Saudiya taraqqiyot jamgʻarmasining oʻzaro hamkorlik faoliyati jalb qilingan. 

Shu bilan birga, Quvayt arab iqtisodiy taraqqiyot jamgʻarmasi hamda Islom taraqqiyot banki mablagʻlari ham respublikaning xalqaro koridorlarini rekonstruksiya qilishda ishtirok etadi.

• O‘zbekiston
• Vazirlik
• Yo‘l-qurilish