Oliy Majlis Qonunchilik palatasining navbatdagi majlisida “Tadbirkorlar kunini belgilash toʻgʻrisida”gi qonun loyihasining muhokamasi boʻlib oʻtdi.

Deputatlar tomonidan birinchi oʻqishda koʻrib chiqilgan qonun loyihasi Prezidentning tadbirkorlar bilan ochiq muloqoti davomida berilgan topshiriqlar hamda 2021-yil 24-avgustdagi tegishli farmoyishi ijrosini taʼminlash maqsadida ishlab chiqilgan.

Qayd etilishicha, soʻnggi besh yilda bu sohani rivojlantirishga qaratilgan 2 mingga yaqin qonun, farmon va qarorlar qabul qilingani natijasida 114 ta litsenziya va ruxsatnoma bekor qilinib, 33 ta faoliyat turi xabardor qilish tartibiga oʻtkazilgan. 

Ruxsatnomalarni rasmiylashtirish tartiblari soddalashtirilgan holda, muddatlari oʻrtacha 2 baravarga qisqartirilgan.
Natijadan yangi subyektlar keskin koʻpayib, avvaldan ishlayotganlari faoliyatini kengaytirmoqda. 

Shuningdek, oxirgi besh yilda tadbirkorlar soni qariyb 3 baravar oshgan. 

Taklif etilayotgan qonun loyihasi bilan yurtimizda 20-avgust — Tadbirkorlar kuni sifatida belgilanmoqda.

Deputatlarning aytishicha, qonun loyihasining qabul qilinishi tadbirkorlarning Oʻzbekiston taraqqiyotiga qoʻshayotgan hissasiga eʼtiborni qaratish va baholash, katta yutuqlarga erishgan, jamiyatning ijtimoiy muammolarini hal etishda faol ishtirok etayotgan tadbirkorlarni aniqlash, ularni taqdirlash, aholini, ayniqsa, yoshlarni biznesga keng jalb qilishga xizmat qiladi.

Majlisda qonun loyihasi deputatlar tomonidan uchinchi oʻqishda ham qabul qilindi.

• Loyiha
• Oliy Majlis