Fermer, dehqon xo‘jaliklari va tomorqa yer egalarini qo‘llab-quvvatlash jamg‘armasi ta’sischiligida “Tomorqachilikni rivojlantirish milliy markazi” MCHJ tashkil etildi. Bu haqida Vazirlar Mahkamasiining “Toshkent viloyatida tomorqachilikni rivojlantirishga doir qo‘shimcha chora-tadbirlar to‘g‘risida”gi qarorida so‘z borgan.

Quyidagilar Markazning asosiy vazifalari va faoliyat yo‘nalishlari etib belgilandi:

- ilmiy va innovatsion faoliyatni samarali tashkil etish orqali aholiga tomorqa yer uchastkalaridan yiliga kamida 3 marta hosil olishga erishishga ko‘maklashish;
- tomorqachilik yo‘nalishi bo‘yicha malaka oshirish va qayta tayyorlash kurslarini tashkil etish;
- ilg‘or yutuqlardan foydalangan holda ko‘chatchilik, urug‘chilik va naslchilikni rivojlantirish, tomchilatib sug‘orishni keng joriy qilish, muqobil energiyadan foydalanish, tomorqa yer uchastkalarida baliq boqish uchun hovuzlar tashkil etish sohasida ilmiy tadqiqotlarni amalga oshirish va boshqalar.

Shuningdek, markazni joylashtirish uchun Yangiyo‘l tumani 1-son kasb-hunar maktabi binosining bir qismi tekin foydalanish huquqi bilan ajratilgan.

Bundan tashqari, tomorqachilik klasteri faoliyatini yo‘lga qo‘yish maqsadida kasb-hunar maktabining qishloq xo‘jaligiga mo‘ljallanmagan 1,24 gektar yer uchastkasi ajratib berilishi nazarda tutilmoqda.

Kasb-hunar maktabining mavjud o‘quv yo‘nalishlari doirasida byudjetdan moliyalashtirish tizimi saqlab qolingan holda, tomorqachilik yo‘nalishini rivojlantirish bo‘yicha malaka oshirish kurslari tashkil etiladi. Maktabda ta’lim jarayoni va o‘quvchilarning amaliyoti Markaz bilan hamkorlikda bajarilishi qayd etilgan.

Ta’kidlash joizki, hujjat Qonun hujjatlari ma’lumotlari milliy bazasida e’lon qilingan va 2021-yil 30-dekabrdan kuchga kirgan.

• Qonun
• Toshkent