Iqtisodiy taraqqiyot va kambag‘allikni qisqartirish vazirligi tuxum mahsulotini mamlakatdan olib chiqib ketishga taqiq qo‘ydi.

Vazirlik mazkur tartibni vaqtinchalik ekanini, shuningdek, ichki bozorda narxlar barqarorligini ta’minlash uchun amaliyotga joriy qilinganini aytmoqda.

Vazirlikka ko‘ra, yilning qish mavsumida ushbu mahsulot narxiga qo‘shimcha bosim yuzaga kela boshlaydi. Masalan, 2021-yilning sentyabr-dekabr oylarida respublika bo‘yicha tuxum narxi 19,6 foizga, ayrim hududlarda esa 20-22 foizgacha qimmatlashgan.

“Tuxum narxining oshishiga qish oylarida isitish xarajatlari oshishi va parrandachilik xo‘jaliklarida kasalliklarning avj olishi, tuxum berishga moslashgan tovuqlarning mavsumiy yangilanishi, ozuqa mahsulotlarining qimmatlashishi hamda kuz mavsumidan boshlab ushbu mahsulotga talabning ortib borishi (boshqa oylarga nisbatan 20-30 foizga oshadi) ta’sir ko‘rsatdi”, – deyiladi vazirlik izohida.

Vazirlik, shu bilan birga, iqtisodiyotda to‘liq bozor mexanizmlarini joriy qilish, tadbirkorlik sub’yektlari uchun cheklovlarni keskin kamaytirish bo‘yicha amalga oshirilayotgan islohotlarni to‘liq qo‘llab-quvvatlashini ma’lum qilgan.

Aksariyat iqtisodchilar esa hukumatning tuxum eksportiga qo‘ygan taqiqi yashirin hujjatlar bilan amalga oshirilganini tanqid ostiga olib, eksportga bo‘lgan cheklovlar tuxum ishlab chiqarishni keskin qisqartirishiga sabab bo‘lishini aytmoqda.

• Eksport
• Iqtisodiyot
• Tuxum
• Vazirlik