“Hayvonot dunyosini muhofaza qilish va undan foydalanish to‘g‘risida”gi Qonun 43-moddasida yovvoyi hayvonlarni yarim erkin sharoitlarda, sunʼiy yaratilgan yashash muhitida yoki tutqunlikda saqlashga Ekologiya va atrof-muhitni muhofaza qilish davlat qo‘mitasi ruxsatnomasi asosida yo‘l qo‘yilishi belgilangan.

Qo‘mitaning taʼkidlashicha, qonunchilik hujjatlarida fuqarolar tomonidan yovvoyi yirtqich va zaharli hayvonlarni uy sharoitida saqlash hamda ulardan foydalanish masalasi huquqiy tartibga solinmasdan qolmoqda.

Shu bois, mazkur qonunning 43-moddasiga o‘zgartish va qo‘shimchalar kiritish to‘g‘risidagi hujjat loyihasi ishlab chiqildi va jamoatchilik muhokamasiga qo‘yildi.

Unga ko‘ra, O‘zbekiston Respublikasi Ekologiya va atrof muhitni muhofaza qilish davlat qo‘mitasi tomonidan tasdiqlanadigan ro‘yxatga muvofiq yovvoyi yirtqich va zaharli hayvonlarni saqlash hamda foydalanish taqiqlanadi.

Bundan ushbu moddaning beshinchi qismida nazarda tutilgan hollar mustasno. Yaʼni, yuridik shaxs maqomiga ega bo‘lgan hayvonot bog‘lari, terrariumlar, sirklar, okeanariumlar, delfinariylar va tabiiy pitomniklar hamda ilmiy va o‘quv maqsadlari uchun ilmiy va taʼlim tashkilotlari yovvoyi yirtqich va zaharli hayvonlarni O‘zbekiston Respublikasi Ekologiya va atrof muhitni muhofaza qilish davlat qo‘mitasi ruxsatnomasi asosida, O‘zbekiston Respublikasi Fanlar akademiyasi bilan kelishgan holda tashkil etiladigan maxsus pitomniklarda saqlashi hamda foydalanishi mumkin.

Shuningdek, mazkur qonunning Ekologiya va atrof muhitni muhofaza qilish davlat qo‘mitasining hayvonot dunyosini muhofaza qilish va undan foydalanish sohasidagi vakolatlari doirasiga “saqlash va foydalanish taqiqlangan yovvoyi yirtqich va zaharli hayvonlarni ro‘yxatini tasdiqlash” ham kiritilmoqda.

Maʼlumot uchun, Qozog‘iston, Rossiya Federatsiyasi va Belarus Respublikasida Hukumat yoki ekologiya sohasidagi maxsus vakolatli organ tomonidan tasdiqlangan ro‘yxatda nazarda tutilgan yovvoyi yirtqich va zaharli hayvonlarni yarim erkin sharoitlarda, sunʼiy yaratilgan yashash muhitida yoki tutqunlikda saqlash taqiqlangan.

• Ekologiya
• Hayvon
• Loyiha
• Yirtqich