Tenderlarni sinov rejimida 2022-yil 1-yanvardan 1-martgacha o‘tkazish belgilangan.

O'zbekiston yo‘lovchi tashish yo‘nalishlari bo‘yicha ochiq tenderlar elektron shaklda tashkil etiladi. Bu haqida Adliya vazirligining Huquqiy axborot kanali xabar berdi.
Ma’lum qilinishicha, hukumatning joriy yil 6-dekabrdagi “Avtomobil transportida yo‘lovchi tashish yo‘nalishlari bo‘yicha ochiq tenderlarni elektron tarzda tashkil etish chora-tadbirlari to‘g‘risida”gi qarori qabul qilingan.
Qarorga muvofiq, 2022-yil 1-yanvardan 1-martgacha yo‘lovchi tashish yo‘nalishlarini ochiq tenderlar orqali biriktirish bo‘yicha elektron tizim test rejimida joriy etiladi. 2022-yil 1-martdan shahar, shahar atrofi, shaharlararo va xalqaro yo‘lovchilar tashish yo‘nalishlarini biriktirish yuzasidan ochiq tenderlar faqat elektron tizim orqali o‘tkaziladi.
Qayd etilishicha, qaror bilan tenderni o‘tkazish tartibiga oid nizom tasdiqlangan. Shuningdek, nizomda tender takliflariga qo‘yiladigan talablar, g‘oliblarni aniqlash, shartnoma tuzish va boshqa qoidalar belgilangan.
Ta’kidlanishicha, 2022-yil 1-iyulgacha hududlarda jamoat transportini rivojlantirish konsepsiyasi ishlab chiqiladi. 

• Qaror
• Transport