O‘zbekistonda Soliq kodeksiga bir qator o‘zgartish va qo‘shimchalar kiritildi. Bu haqida Adliya vazirligining Huquqiy axborot kanali xabar berdi.

Ma’lum qilinishicha, “O‘zbekiston Respublikasi Soliq kodeksiga o‘zgartish va qo‘shimchalar kiritish to‘g‘risida”gi qonun Prezident tomonidan imzolangan. Qonun bilan foydali qazilmalarni qazib olganlik uchun maxsus renta solig‘i joriy etilgan.
Shuningdek, qimmatbaho, rangli va radioaktiv metallarni, nodir elementlarni va nodir yer elementlarini qazib oluvchi va ularni texnogen mineral hosilalardan ajratib oluvchi, uglevodorod xomashyosini qazib oluvchi yuridik shaxslar foydali qazilmalarni qazib olganlik uchun maxsus renta solig‘ini to‘lovchilar hisoblanadi.

Qayd etilishicha, mazkur soliq stavkasi soliq bazasiga nisbatan 25 foiz miqdorida belgilanadi. Shuningdek, mazkur soliq to‘lovchisi bo‘lgan chet el investorlari soliq hisobini dollarda yuritishi mumkin. Soliq imtiyozlarini hisobga olish axborot tizimlari orqali va maxsus identifikatsiya kodini bergan holda amalga oshiriladi.

Bundan tashqari, tamaki va alkogol mahsulotlariga nisbatan yangi soliq stavkalari belgilanadi. Jumladan, filtrli, filtrsiz sigaretalar, papiroslar, sigarillalar (sigaritlar), bidi, kreteklar uchun quyidagicha belgilangan:

- import qilinganda — 360 ming so‘m/1000 dona + 10 foiz (ilgari 400 ming so‘m/1000 dona + 10 foiz edi);
ishlab chiqariladigan — 2022-yil 1-yanvardan: 185 ming so‘m/1000 dona + 10 foiz, 2022-yil 1-iyundan: 203 ming 500 so‘m/1000 dona + 10 foiz (ilgari 2021 yil 1 oktyabrdan: 185 ming so‘m/1000 dona + 10 foiz edi).
Shu bilan birga, aroq, konyak va boshqa alkogol mahsulotlari uchun:
- import qilinganda — 45 ming so‘m/1 litr uchun (ilgari 50 ming so‘m/1 litr uchun);
ishlab chiqarilganda — (1 dekalitr tayyor mahsulot uchun) 2022-yil 1-yanvardan 125 ming 100 so‘m, 2022 yil 1 iyundan 138 ming so‘m (ilgari 2021-yil 1-oktyabrdan 125 ming 100 so‘m).

Shuningdek, mobil aloqa xizmatlari va shakar uchun aksiz solig‘i o‘zgartirishsiz qoldirildi (15 va 20 foiz). Bundan tashqari, soliq imtiyozlarida soliq to‘lovchining professional va oliy ta’lim muassasalarida o‘qish uchun banklardan olingan ta’lim kreditlariga yo‘naltirilgan daromadlari, ish haqi hamda talabalarga ijaraga berilgan uy-joylardan olingan daromadning soliqqa tortilmasligi belgilangan.

Soliq to‘lovchining ba’zi to‘lovlarni to‘lash uchun yo‘naltiriladigan BHMning 8 baravarigacha bo‘lgan ish haqi summalari va boshqa daromadlaridan soliq olinmasligi belgilangan. Bularga xalqaro tashkilotlarga a’zolik badallari hamda qayta tayyorlash va malaka oshirish uchun nodavlat ta’lim tashkilotlariga to‘lovlar kiritilgan.
Ta’kidlanishicha, yuridik shaxslarning mol-mulkiga solinadigan soliq 2 foizdan 1,5 foizga, qurilishi normativ muddatda tugallanmagan ob’yektlarga nisbatan 4 foizdan 3 foizga kamaytirilgan. Yetim bolalar va ota-ona qaramog‘idan mahrum bo‘lgan bolalar mulkida bo‘lgan mol-mulk esa soliq solishdan ozod etiladi.

Shuningdek, 2021-yil 1-sentyabrdan 2021-yil 31-dekabrga qadar bo‘lgan davrda umumiy ovqatlanish korxonalari yuridik shaxslardan olinadigan yer solig‘ini va yuridik shaxslarning mol-mulkiga solinadigan soliqni to‘lashdan ozod etiladi.
Respublika tumanlarida (bundan Toshkent shahri mustasno) faoliyatni amalga oshiruvchi yakka tartibdagi tadbirkorlar uchun belgilangan ijtimoiy soliq stavkasi 2022-yil 1 -anvardan 2023-yil 1-yanvarga qadar BHMning 50 foizi miqdorida qo‘llaniladi.

• Adliya