O‘zbekistondagi eng yirik sement zavodi — “Qizilqumsement” korxonasining ustav kapitalidagi 86,9 foiz aksiyalar paketini xususiylashtirishga tayyorlash jarayoni boshlandi. Bu haqida Davlat aktivlarini boshqarish agentligi huzuridagi UzAssets investitsiya kompaniyasi matubot xizmati xabar berdi.

Ma’lum qilinishicha, O‘zbekiston Prezidentining 2020-yil 27-oktyabrdagi “Davlat ishtirokidagi korxonalarni isloh qilishni jadallashtirish hamda davlat aktivlarini xususiylashtirishga oid chora-tadbirlar to‘g‘risida”gi farmoni doirasida “Qizilqumsement” korxonasi ustav kapitalidagi 86,9 foiz aksiyalar paketini xususiylashtirishga tayyorlash va to‘liq xususiy sektorga sotish ko‘zda tutilgan.
Farmonda belgilangan vazifalardan kelib chiqib, Davlat aktivlarini boshqarish agentligi huzuridagi UzAssets investitsiya kompaniyasi va

“Qizilqumsement” tomonidan korxona joriy holatining kompleks tahlilini (due diligence) o‘tkazish maqsadida Deloitte xalqaro konsalting kompaniyasi maslahatchi sifatida jalb etilgan.

Tahlil natijalariga ko‘ra, maslahatchi tomonidan korxonaning joriy holati to‘g‘risida batafsil hisobot, shuningdek, korxonani xususiylashtirishda e’tiborga olinishi kerak bo‘lgan asosiy omillar bo‘yicha bir qator tavsiyalar tayyorlangan.
Xususan, maslahatchi tomonidan O‘zbekiston sement bozorida katta hajmdagi yangi ishlab chiqarish quvvatlarining ishga tushirilishi bilan bog‘liq raqobatning sezilarli darajada keskinlashuvi qayd etilgan. Shuningdek, korxona mintaqaning ijtimoiy sohasi uchun muhim ahamiyat kasb etishi ta’kidlangan.

Bundan tashqari, UzAssets investitsiya kompaniyasi va “Qizilqumsement” tomonidan korxonani baholash uchun Grant Thornton mustaqil xalqaro baholash kompaniyasi jalb qilingan. Korxonaning, shu jumladan, davlatga tegishli bo‘lgan aksiya paketining bozor qiymatini baholash bo‘yicha hisobot tayyorlangan.

Shu bilan birga, UzAssets tomonidan, maslahatchi ko‘magida korxonaning ustav kapitalidagi ulushni sotib olish bo‘yicha kelib tushgan takliflar korxona faoliyati tahlili jarayonida belgilab olingan asosiy mezonlarga va tarmoqni strategik rivojlantirish maqsadlariga muvofiqligini o‘rganish yakunlanmoqda. Ushbu jarayonning keyingi bosqichlari to‘g‘risida ma’lumotlar yaqin muddatlarda rasmiy veb-sayt va OAVlarda qo‘shimcha ravishda e’lon qilinadi.

• Sement