Hukumatning pirotexnika buyumlari muomalasiga oid qarori qabul qilindi.

O‘zbekistonda hukumat qaroriga muvofiq pirotexnika vositalarining faqatgina litsenziyaga ega yuridik shaxslar tomonidan olib kirilishiga ruhsat beriladi. Bu haqida Adliya vazirligining Huquqiy axborot kanali xabar berdi.
Ma’lum qilinishicha, hukumatning 1-dekabrdagi "O‘zbekiston Respublikasi hududida pirotexnika buyumlari muomalasi sohasida davlat nazoratini kuchaytirishga doir chora-tadbirlar to‘g‘risida"gi qarori qabul qilingan.
Qarorga muvofiq, xavflilikning II klassiga tegishli maishiy pirotexnika buyumlarining jismoniy va yuridik shaxslar tomonidan muomalasi taqiqlanadi. Shu bilan birga, texnik va maxsus maqsaddagi pirotexnika buyumlari Prezident yoki hukumat qarorlariga muvofiq ommaviy tadbirlarda litsenziyaga ega yuridik shaxslar tomonidan olib kirilishi mumkin.
Qayd etilishicha, pirotexnika buyumlarining noqonuniy muomalasi bilan shug‘ullanganlarni aniqlash va javobgarlikka tortish bo‘yicha kompleks choralar ko‘riladi.

• Pirotexnika
• Qaror