O‘zbekistonlik avtofiribgar Istanbulda qo‘lga olindi. Bu haqda O‘zbekistonning Istanbuldagi Bosh konsulxonasi xabar qildi. Jabr ko‘rgan fuqarolardan O‘zbekiston Ichki ishlar vazirligi yoxud uning quyi tizimlariga murojaat qilish so‘raladi.

Turkiya va O‘zbekiston Ichki ishlar vazirliklari hamkorligida o‘tkazilgan tezkor tadbir davomida Istanbul shahrida qo‘lga olingan, 2015-yildan buyon avtomobil oldi-sotdi sohasida ko‘plab firibgarlik jinoyatlarini sodir etganlikda ayblanib qidiruvda bo‘lgan, 1969-yilda tug‘ilgan “I.U.B.” 2025-yil 11-yanvar kuni Bosh konsulxona xodimlari ishtirokida O‘zbekiston Respublikasiga deportatsiya qilingan.

“Jinoiy javobgarlikdan qochib xorijiy davlatlarda, shu jumladan Turkiyada yashirinib yurgan har bir shaxsga nisbatan jinoiy ta’qib izchil ravishda davom ettiriladi va jinoyat uchun javobgarlik prinsipi qat’iy ta’minlanadi”, – deyiladi konsullik xabarida.

Bundan tashqari, Istanbul Bosh konsulxonasi keyingi vaqtlarda firibgarlik sodir etilishi holatlari ko‘paygani sabab fuqarolardan firibgarlarga aldanib qolishdan ogoh bo‘lishlarini so‘raydi.

• Istanbul
• Konsullik