Turkiya OAVda 21-sentyabr kuni Istanbul shahrida o‘z uyida pichoqlab o‘ldirilgan 36 yoshli Zulayho ismli O‘zbekiston fuqarosining vafoti haqida ma’lumotlar tarqaldi.

O‘zbekistonning Istanbuldagi Bosh konsulxonasi tomonidan holatga oydinlik kiritish maqsadida amalga oshirilgan ishlar natijasida, halok bo‘lgan shaxs O‘zbekiston fuqarosi A.X. ekanligi aniqlangan.

Ma’lum bo‘lishicha, u bir necha yil avval Turkiyada bo‘lish qoidalarini buzgani uchun deportatsiya qilingan va mamlakatga kirish taqiqlangan. Keyinchalik ism-familiyasini o‘zgartirgan holda Turkiyaga borgan.

Aniqlanishicha, A.X. noma’lum shaxs tomonidan pichoqlab o‘ldirilgani ma’lum bo‘lgan. Jinoyat bo‘yicha mahalliy huquqni muhofaza qiluvchi idoralar tergov harakatlarini olib bormoqda.

Bosh konsulxona tomonidan marhumning oila a’zolariga jasadni O‘zbekistonga yuborish uchun zarur konsullik-huquqiy yordam ko‘rsatilmoqda.

• Istanbul
• Konsullik
• O‘zbekistonlik
• Pichoq
• Turkiya