Amerikaning CNN telekompaniyasi butun dunyo istedodli va iqtidorli yoshlari haqidagi yangi “The Generation Next” loyihasini boshladi. Bu haqida CNN rasmiy sahifasida ma’lumot berildi.

E’tiborli jihati mazkur loyihaning birinchi dasturida Amerikaning Super Dispatch texnologik kompaniyasida ishlaydigan o‘zbekistonlik dasturchi qiz Durdona Bahronova mehmon bo‘lgan.

Asli buxorolik bo‘lgan dasturchi ilm olish maqsadida Toshkentga kelgan. Dastlab biologiyaga qiziqqan Durdonaning aytishicha, u dasturlash sohasiga kirib kelgan dastlabki vaqtlarda bu sohada ishlaydigan ayollar salmog‘i juda kam bo‘lgan. Shu sabab biroz umidsizlikka tushgan. Ammo u dasturlashning kuchini anglab yetganida, ortga yo‘l yo‘q ekanligini tushungan va bugungi kunda mazkur sohada muvaffaqiyatga erishdi.

“Ayollar hayot tarzidagi muammolarni hal qilish erkaklarga qolishi kerak emas. Chunki ular hamma uchun mo‘ljallangan mahsulot yaratishga harakat qilishsa-da, ayollarga taalluqli masalalarda baribir ayol mutaxassislar talab etiladi”, – degan u.

Ya’ni bu gaplari bilan u ayollarga mo‘ljallangan dasturlarni tayyorlashda ayollar nuqtai nazaridan yondashish uchun ularning o‘zlari ana shu sohada faoliyat olib borishlar kerakligiga ishora qilgan.

• IT